जळगाव (प्रतिनिधी) नाथा भाऊची छळवणूक सुरूच आहे, त्याला आपण घाबरत नाही, असा सणसणीत टोला राष्ट्रवादी काँग्रेसचे नेते एकनाथ खडसे यांनी भाजप नेते गिरीश महाजन यांना लगावला आहे. तसेच जिल्हा बँकेच्या चौकशीची कुणी घोषणा करीत असेल तर बँकेची चौकशी जरूर लावावी, असे आवाहनही खडसे यांनी केलं आहे.
जळगाव येथील लेवा भवनात सहकार पॅनलच्या प्रचार सभेत ते बोलत होते, भाजप नेते व माजी मंत्री गिरीश महाजन यांनी जिल्हा बँक निवडणुकीतून माघार घेतली. मात्र, आम्ही बँकेची चौकशी लावू अशी घोषणा केली. तोच धागा पकडून नाव न घेता या वेळी बोलताना खडसे म्हणाले की, गेल्या पाच वर्षात जिल्हा बँक अत्यंत सुस्थित आणली आहे. देशातील दहा बँकात जिल्हा बँकेचा क्रमांक आहे. त्यामुळे जिल्हा बँकेच्या चौकशीची कुणी घोषणा करीत असेल तर आपले आव्हान आहे, की त्यांनी बँकेची चौकशी जरूर लावावी. अशीही आपली छळवणूक सुरूच आहे, त्याला आपण घाबरत नाही. अगदी जिल्हा बँकेची ईडीची चौकशी लावावी जर त्यात एक रुपयाचा भ्रष्टाचार सापडला तर आपण राजकारणातून निवृत्त होवू, जिल्हा बँकेला ५६ कोटी रुपयांचा नफा झाला आहे. आगामी काळात बँक शेतकऱ्यांच्या अधिक हितासाठी काम करेल त्यासाठी सहकार पॅनलच्या उमेदवारांना विजयी करावे असे आवाहन खडसे यांनी केले.
