पुणे (वृत्तसंस्था) किशोरवयीन मुलावर एका महिलेने जबरदस्तीने लैंगिक अत्याचार केल्याचा धक्कादायक प्रकार रविवारी पुण्यातील कोंढवा परिसरात उघडकीस आला. यासंदर्भात चौकशीसाठी या महिलेला ताब्यात घेण्यात आले आहे. या किशोरवयीन मुलाने यासंदर्भात कोंढवा पोलीस ठाण्यात फिर्याद नोंदवली आहे.
संशयित आरोपी असलेली महिला या मुलाच्या घराशेजारी राहायला आहे. तिने त्याच्याशी जबरदस्तीने शारीरिक संबंध ठेवले. तसेच वेळोवेळी ब्लॅकमेल करून ती त्याच्यावर अत्याचार करत होती. पोलिसांकडे तक्रार करण्याची भीती दाखवून गेली दोन वर्षे तिचे हे चाळे सुरू होते. तिने या मुलासोबतचे व्हिडीओ सोशल मीडियावर व्हायरल करण्याची धमकी दिली होती. त्यानंतर या मुलाने पालकांना सर्व प्रकार सांगितला. त्यांनी या महिलेविरुद्ध रविवारी रीतसर तक्रार दिली. यासंदर्भात या महिलेविरुद्ध बाल लैंगिक अत्याचार प्रतिबंधक कायद्यान्वये (पॉक्सो) गुन्हा दाखल केला आहे.
कोरोना काळात या महिलेच्या पतीचे निधन झाले होते. त्यानंतर ही महिला एकटीच राहात होती. यानंतर तिने अल्पवयीन तरुणाला धमकावणे सुरू केले आणि त्याच्यासोबत जबरदस्तीने शरीर संबंध ठेवले. या संपूर्ण कृत्याची तिने मोबाईलमध्ये व्हिडिओ क्लिप देखील तरुणाला काढण्यासाठी भाग पाडली. मे 2021 ते नोव्हेंबर 2022 या कालावधीत हा संपूर्ण प्रकार घडला आहे. दरम्यान या महिलेने तरुणाविरुद्ध त्याने जबरदस्ती केल्याची खोटी तक्रार पोलिसात करण्याचीही धमकी दिली होती.
