जळगाव (प्रतिनिधी) नगर जिल्ह्यात ‘खूपिया पोलीस’ असल्याचे सांगून एका आठ वर्षीय मुलीवर झालेल्या बलात्काराप्रकरणी जळगावात तपासासाठी आल्याची बतावणी करून व्यापाऱ्याला गंडवल्याची घटना घडली आहे.
पिंप्राळा हुडको परिसरातील ख्वाजानगर येथील शेख आसिफ शेख मुनाफ (वय ३२) हे नेहमी प्रमाणे सेट विक्रीच्या ठिकाणी बसलेले असताना एक अनोळखी इसम आला. त्याने शेख आसिफ यांना नगर जिल्ह्यात ‘खूपिया पोलीस’ असल्याचे सांगितले. नगर येथे आठ वर्षीय मुलीवर झालेल्या बलात्काराप्रकरणी तपासासाठी जळगावात आल्याची बतावणी केली. एवढेच नव्हे तर पोलीस असल्याचे बनावट आयकार्डही त्याने शेख आसिफ यांना दाखविले. त्यानंतर जिल्हापेठ पोलीस ठाण्यात हजेरी लावण्यासाठी जायचे असल्याचे सांगत शेख आसिफ यांच्याकडं दुचाकीची मागितली. शेख आसिफ यांनी त्याच्यावर विश्वास ठेवून त्याला त्यांची (एम. एच. १९ ए. वाय. ८२३२) या क्रमांकाची दुचाकी दिली. परंतू त्यानंतर तो भामटा पुन्हा परतलाच नाही. शेख आसिफ यांनी त्यांचा भाऊ शेख युसूफ व इतरांसोबत परिसरात तसेच शहरात इतरत्र दुचाकीचा शोध घेतला मात्र दुचाकी काही सापडली नाही. अखेर रविवारी शेख आसिफ यांनी रामानंदनगर पोलीस ठाणे गाठून अज्ञाताविरुद्ध गुन्हा दाखल केला आहे.
