नागपूर (वृत्तसंस्था) प्रतापनगर पोलीस ठाण्याच्या हद्दीत एका सिमेंट मिक्सरने दुचाकीला धडक दिली. या अपघातात महिलेचा मृत्यू झाला. अपघातानंतर आरोपी सिमेंट मिक्सर सोडून पळून गेला. सुनीता बी. रमणाकर नायडू (५३, रा. एफ/९३, राजविलास अर्पाटमेंट, नरेंद्रनगर) असे मृत महिलेचे नाव आहे. सुनिता नायडू नेहमी प्रमाणे मुलीला ट्यूशनला सोडून घराकडे परतत होत्या. त्यावेळी हा अपघात झाला.
रविवार, १६ जुलै रोजी सकाळी ८.४५ वाजेच्या सुमारास सुनीता बी. रमणाकर नायडू नेहमीप्रमाणे मुलगी अनुष्का (१६) ला सोमलवार हायस्कूलमध्ये शिकवणीवर्गासाठी घेऊन जात होत्या. त्यांनी मुलीला अॅक्टिव्हा (क्रमांक एमएच ३१/ एफएम ८९०५) वरून सोडल्यानंतर त्या वर्धा रोडने घरी परत येत होत्या. त्यावेळी जयप्रकाशनगर चौक येथे सिमेंट मिक्सर क्रमांक (एमएच ४६ / एफ ३१७३) चालकाने त्याच्या ताब्यातील वाहन भरधाव व निष्काळजीपणे चालवून सुनीता नायडू यांच्या अॅक्टिव्हाला धडक दिली. या अपघातात त्या खाली पडल्याने गंभीर जखमी झाल्या. अपघातानंतर आरोपी घटनास्थळी वाहन सोडून पळून गेला.
दरम्यान, सुनीता यांना जखमी अवस्थेत उपचाराकरिता मेडिकल हॉस्पिटल येथे दाखल केले असता उपचारादरम्यान डॉक्टरांनी तपासून मृत घोषित केले. याप्रकरणी फिर्यादी बी. रमणाकर कृष्णराव नायडू (५५, रा. एफ/ ९३, राजविलास अपार्टमेंट, नरेंद्रनगर) यांनी दिलेल्या तक्रारीवरून प्रतापनगर पोलिसांनी आरोपीविरुद्ध विविध कलमांन्वये गुन्हा दाखल केला आहे. पोलीस आरोपीचा शोध घेत आहेत. या अपघातानंतर सुनिता नायडू यांच्या कुटुंबीयांना मोठा धक्का बसला आहे.
