नागपूर (वृत्तसंस्था) नागपूरवरून ब्रह्मपुरी तालुक्यातील किन्ही येथे जात असलेल्या कारला ट्रॅव्हल्सची जोरदार धडक बसली. यात कारमधील पाच जण जागीच ठार झालेत तर ९ वर्षाच्या चिमुकलीचा उपचारादरम्यान मृत्यू झाला. ही घटना रविवारी दुपारच्या सुमारास घडली.
रोहन विजय राऊत (30), ऋषिकेश विजय राऊत (२८), गीता विजय राऊत (५२, रा. चंदननगर नागपूर), सुनीता रूपेश फेंडर (४०), प्रभा शेखर सोनवणे (३५ रा. नागपूर), यामिनी रूपेश फेंडर (९) अशी मृतांची नावे आहेत. मृत एकाच परिवारातील आहेत.
मिळालेल्या माहितीनुसार रोहन राऊत हे गेल्या वर्षभरापासून पत्नीपासून विभक्त राहत होते. त्यांची पत्नी ब्रह्मपुरी तालुक्यातील किन्ही या गावात मुलासोबत राहते. मुलाची शाळेची फी भरायची असल्याने संपूर्ण परिवार फीचे पैसे देण्याच्या आणि मुलाला भेटण्याच्या उद्देशाने (एमएच ४९ बीआर २२४२) या क्रमांकाच्या अल्टो कारने नागपूरवरून ब्रह्मपुरी तालुक्यातील किन्ही येथे जात होते, तर एआरबी कंपनीची (एमएच ३३ टी २६७७) ही ट्रॅव्हल्स नागभीडवरून नागपूरला जात होती.
दुपारी साडेतीन वाजेच्या सुमारास ट्रॅव्हल्सने कान्पा गावाजवळ कारला धडक दिली. ही धडक इतकी जोरदार होती की, कारचा पुढील भागाचा चुराडा झाला आणि चार जण जागीच जागीच ठार झाले होते. तर मागच्या सीटवर बसलेली एक महिला धक्क्याने एकदम समोर उसळली होती. या अपघातात कारचा पूर्ण चेंदामेंदा झाल्याने कारमधील मृतदेह काढण्यास अडचण येत होती. म्हणून गॅस कटरच्या सहाय्याने दरवाजे तोडून मृतदेह बाहेर काढावे लागले. दरम्यान, पोलिसांनी खासगी बस चालकाला ताब्यात घेतलं आहे.
