जळगाव (प्रतिनिधी) मुक्ताईनगर तालुक्यातील एका व्यक्तीची ऑनलाईन फसवणूक झाल्याचा प्रकार समोर आला आहे. क्रेडीट कार्ड अॅक्टीव करुन देतो असे सांगुन ओटीपी घेवून त्याद्वारे ऑनलाईन खरेदी करून ९९ हजार ८६२ रुपयांची फसवणूक केली. याप्रकरणी जळगाव सायबर पोलीस ठाण्यात अज्ञात व्यक्तीविरुद्ध गुन्हा दाखल करण्यात आला आहे.
यासंदर्भात संजय श्रीराम पाटील (वय ५४, बेलसवाडी ता. मुक्ताईनगर) यांनी दिलेल्या फिर्यादीनुसार, दि. 03 जानेवारी 2021 व दि. 05 जानेवारी 2021 दरम्यान सेंट्रल बँक व स्टेट बँकेचे संयुक्त बँकेचे क्रेडीट कार्ड बँकेने फिर्यादीचे घरी पोस्टाने पाठविले परंतु सदर क्रेडीटकार्ड मिळणेबाबत फिर्यादीने कोणत्याही बँकेच्या शाखेत अर्ज केलेला नव्हता व तोंडी मागणी केली नव्हती. तसेच कोणीतरी अज्ञात इसमाने मोबाईल क्रमांकावरुन फिर्यादीचे वरनमुद मोबाइलवर फोन करुन तो बँकेतुन बोलत आहे व तुमचे क्रेडीट कार्ड अॅक्टीव करुन देतो असे सांगुन फिर्यादी कडुन ओटीपी घेवून त्याद्वारे वन प्लस स्टोर येथुन 91,895 रुपयांची ऑनलाईन खरेदी केली आहे व ग्रोफर इंडीया प्रा.लि. गुडगाव हरीयाणा येथुन 7,964 रुपयांची ऑनलाईन खरेदी केली असुन असे एकुण 99,862 रुपये फिर्यादीचे परवानगी शिवाय त्यांचा विश्वास संपादन करुन कोणीतरी त्यांचे नमुद क्रेडिट कार्डद्वारे ऑनलाईन खरेदी करुन फिर्यादीची फसवणूक केली. याप्रकरणी जळगाव सायबर पोलीस ठाण्यात अज्ञात व्यक्तीविरुद्ध गुन्हा दाखल करण्यात आला असून पुढील तपास पोलीस निरीक्षक लिलाधर कानडे करीत आहेत.
