चाळीसगाव (प्रतिनिधी) हरिद्वार येथे यात्रेसाठी आई-वडील जात असल्याने त्यांना रेल्वेत गाडीत बसवून नंतर उतरताना शिक्षकाचा मृत्यू झाल्याची दुर्दैवी घटना चाळीसगाव रेल्वेस्थानकावर गुरुवारी पहाटे घडली. योगेश गंभीरराव सूर्यवंशी (वय ४१) असे मयत शिक्षकाचे नाव आहे.
या संदर्भात अधिक असे की, तालुक्यातील माळशेवगे येथील रहिवासी योगेश सूर्यवंशी हे चिंचगव्हाण येथील माध्यमिक विद्यालय शाळेत शिक्षक असून ते परिवारासह शहरातील भडगाव रोडवरील विवेकानंद कॉलनीमध्ये राहत होते. आई-वडील हरिद्वार येथे जात असल्याने त्यांना सोडण्यासाठी गुरुवारी पहाटे ५ वाजेच्या सुमारास चाळीसगाव रेल्वेस्थानकावर योगेश सूर्यवंशी गेले होते. आई-वडिल यात्रेला जात असल्यामुळे योगेश सूर्यवंशी मोठ्या आनंदात होते.
आई-वडिलांना दादर अमृतसर एक्स्प्रेसमध्ये बसवित असतांना गाडी सुरू झाल्याने योगेश सूर्यवंशी हे घाईत रेल्वे गाडीतून उतरायला लागले. गाडी सुरु झाल्याने ते रेल्वेत ओढले गेल्याने त्यांचा जागीच दुर्दैवी मृत्यू झाला. हा प्रकार प्लॅटफॉर्मवरील काही प्रवाशांच्या लक्षात आला. त्यांनी घटनास्थळी धाव घेतली. परंतू तो पर्यंत खूप उशीर झालेला होता. दरम्यान, मयत शिक्षक योगेश सूर्यवंशी यांच्यावर दुपारी अत्यंत शोकाकुल वातावरणात अंत्यसंस्कार करण्यात आले. त्याच्या पश्चात आई-वडील, पत्नी, मुलगा, मुलगी असा परिवार आहे . ते जि.प.चे माजी सदस्य धर्मा रामा वाघ याचे जावई होत.
