जळगाव (प्रतिनिधी) जिल्ह्यातील १० पोलिस ठाण्यांचे विभाजन करण्याचा निर्णय घेण्यात आला आहे. यातून नवीन स्थानके व दूरक्षेत्रांची निर्मिती करण्यात येणार आहे. याबाबत सोमवारी १३ मार्च रोजी पोलिस अधीक्षक कार्यालयात बैठक होणार आहे.
जळगाव जिल्ह्यातील बऱ्याच पोलिस ठाण्यांवर कामाचा भार वाढला आहे. त्यामुळे त्यांचे विभाजन करण्यात यावे, अशी मागणी होती. या अनुषंगाने जिल्ह्यातील १० पोलिस ठाण्यांचे विभाजन करण्याची प्रक्रिया सुरू करण्यात आली आहे. आली आहे. यात अमळनेर पोलिस ठाण्याचे विभाजन करून शहर आणि ग्रामीण असे दोन पोलिस ठाणे होतील.
जळगाव एमआयडीसी ठाण्याचे विभाजन होणार असून म्हसावद येथे नवीन पोलिस ठाणे, जळगाव शहर पोलिस ठाण्याचे विभाजन होऊ शिवाजी नगरसाठी स्वतंत्र पोलिस ठाणे कार्यरत होईल. पाचोरा ठाण्याचे विभाजन होऊन नगरदेवळा येथे नवीन ठाणे होणार आहे. तर पारोळ्याचे विभाजन होऊन तामसवाडी येथे, मुक्ताईनगर पोलिस स्थानकाचे विभाजन होऊन कुऱ्हा – काकोडा, पहूरचे विभाजन होऊन शेंदुर्णी येथे, भडगावचे विभाजन होऊन कजगाव येथे पोलिस दूरक्षेत्र बनणार आहे. निंभोऱ्याचे विभाजन होऊन ऐनपूर येथे तर मेहुणबाऱ्याचे विभाजन होऊन पिलखोड येथे पोलिस दूरक्षेत्र होणार आहे.
