वरणगाव (प्रतिनिधी) दुचाकीचा कट लागल्यामुळे झालेल्या वादातून एका तरुणाच्या छातीत चॉपर खुपसून निर्घृण करण्यात आल्याची खळबळजनक घटना मंगळवारी दुपारी क्वॉलेी इलेक्ट्रीक दुकाना जवळ घडली. सय्यद आरिफ सय्यद समदअली (वय २८), असे मयत तरुणाचे नाव आहे. संशयित आरोपींनी अन्य तिघांवर देखील चॉपरने वार करीत गंभीर जखमी केले. खून केल्यानंतर संशयित मारेकरी घटनास्थळाहून पसार झाले असून एलसीबीचे पथक त्यांच्या मागावर आहे. याप्रकरणी वरणगाव पोलिसात उशीरापर्यंत गुन्हा नोंद करण्याचे काम सुरू होते.
शाब्दिक वादाचे रूपांतर हाणामारीत !
भुसावळ तालुक्यातील वरणगाव येथील सय्यद आरिफ सय्यद समदअली हा तरुण कांदे बटाटे विक्रीचा व्यवसाय करीत होता. त्या तरुणाचे गावातीलच काही लोकांसोबत वाद होते. मंगळवार दि. ४ जून रोजी दुपारी त्याने दोन वाजेच्या सुमारास मराठे पान मंदिराच्या आवारात त्याची दुचाकी लावली होती. त्याचवेळी जुना वाद असलेल्या व्यक्तीने देखील त्याच्या दुचाकीजवळ दुचाकी लावली. यामधूनच दोघांमध्ये शाब्दिक वाद झाला व या शाब्दिक वादाचे रूपांतर हाणामारीत झाले. त्यांच्यातील वाद विकोपाला गेल्यानंतर वाद घालणाऱ्या एकाने सय्यद आरिफ या तरुणावर चॉपरने वार केले. तसेच त्याच्यासोबत असलेल्यांवर देखील तिघांवर प्राणघातक हल्ला केला. यात सय्यद आरिफ याच्या छातीत चॉपर घुसल्याने तो खाली कोसळून त्याचा जागीच मृत्यू झाला.
खून केल्यानंतर तिघांवर केला प्राणघातक हल्ला !
तरुणाच्या छातीत चॉपर खुपसल्यानंतर त्याच्या सोबत असलेल्या आकिब अली कमर अली (वय २२) याच्या गळ्यावर, उजव्या हातावर तर मुश्ताक अली सय्यद (वय ५० वर्ष. दोघ रा. गौसीयानगर वरणगाव) यांच्या डोक्यावर वार करण्यात आले असून यामध्ये ते गंभीर जखमी झाले असून त्यांना तात्काळ वरणगाव ग्रामीण रुग्णालयात उपचार करून तिघांना लागलीच डॉ. उल्हास पाटील वैद्यकीय महाविद्यालयात उपचारासाठी दाखल करण्यात आले.
रात्री उशिरापर्यंत सुरु होते गुन्हा दाखल करण्याचे काम !
वैद्यकीय अधिकाऱ्यांनी आरीफ अली समद अली सय्यद याला मयत घोषित करण्यात आले. तर आकिब अली कमर अली सय्यद, मुश्ताक अली लाल सय्यद, समीर खान अजीज खान यांच्यावर उपचार सुरु आहेत. मयत आरिफ याचा मृतदेह पुढील कार्यवाहीसाठी शासकीय वैद्यकीय महाविद्यालय व रुग्णालयात दाखल करण्यात आला होता. याप्रकरणी वरणगाव पोलीस ठाण्यात गुन्हा दाखल करण्याचे काम सुरू होते.
फॉरेन्सिकच्या पथकाने गोळा केले पुरावे !
फॉरेन्सिक लॅब जळगाव वरणगावात दाखल पोलिस निलेश भावसार, हरीष परदेशी यांनी खून झालेल्या ठिकाणाहून पुरावे गोळा केले. तसेच मुक्ताईनगर पोलिस विभागीय अधिकारी राजकुमार शिंदे यांनी भेट देवून घटनेची माहिती जाणून घेतली. यावेळी वरणगाव पोलीस स्टेशनचे सपोनि भरत चौधरी, नागेंद्र तायडे, ईश्वर तायडे भुषण माळी, मनोहर पाटील, पराग दुसाणे, सुकराम सावकारे, योगेश पाटील, प्रविण पाटील, साहेबराव कोळी तपास करीत आहेत.
खुनाच्या घटनेने खळबळ !
शहरातील मुख्य बाजारपेठेत असलेल्या सिनेमा रोड चौकात दुपारच्या वेळेस असलेल्या शांततेची संधी साधून हल्लेखोरांनी चौघांवर चाकुने वार करीत घटनास्थळावरून लागलीच पळ काढला . तर घटनेत जख्मी झालेल्यांनी धावपळ सुरू ठिकठिकाणी मोठ्या प्रमाणात रक्ताचा सडा पडलेला असल्याने नागरिकांमध्ये भितीचे वातावरण निर्माण झाले आहे.