धरणगाव (प्रतिनिधी) व्याजाने घेतलेले पैसे चेकद्वारे व फोन पे ने परतफेड करूनही हॉटेल व्यावसायिकाला शिवीगाळ करून धक्काबुक्की केल्याची घटना धरणगाव येथील व्हाईट हाऊस हॉटेल येथे घडली. याप्रकरणी आरोपी सुनील चौधरी याच्या विरुद्ध धरणगाव पोलीस स्थानकात गुन्हा दाखल करण्यात आला आहे.
याबाबत अधिक माहिती अशी की, अवधेश चत्रभुज वाजपेयी यांचा हॉटेल व्यवसाय आहे. त्यांचा मोठा भाऊ कै. आशिष चत्रभुज वाजपेयी हे कॅन्सरने आजारी होते. भावाच्या उपचारासाठी त्यांनी जी.एस. लॉन्सचा पार्टनर व व्याजाचा धंदा करणारा सुनिल पंढरीनाथ चौधरी (रा. कोर्ट बाजार, धरणगाव) याच्याकडून 5 वर्षांपूर्वी मे २०१९ मध्ये सावकारी टक्केवारी व्याजाने रोख 5 लाख रुपये घेतले होते. नोव्हेंबर २०२३ मध्ये त्यांचा मोठा भाऊ कै. आशिष चत्रभुज वाजपेयी हे उपचार घेत असतांना मयत झाले. त्यानंतर त्यांचा पुतण्या लक्ष वाजपेयी याने हॉटेल व्यवसाय करुन सुनिल चौधरी याच्याकडून घेतलेले पाच लाख रुपये व्याजासह चेकद्वारे व फोन पे ने वेळोवेळी परत केले. तरी दि.०६ एप्रिल २०२५ रोजी रात्री ११.३० वाजेच्या सुमारास सुनिल चौधरी याने त्यांच्या गणेश फूड पॅलेस (व्हाईट हाऊस)च्या समोर येऊन व्याजाचे पैशाची मागणी केली. एवढेच नाही तर मला तुझे एखादे शेत नावावर करुन दे किंवा तुझ्या हॉटेलमध्ये मला पार्टनर कर असे म्हणाला. तेव्हा अवधेश वाजपेयी यांनी त्यास सांगितले की, मी तुझे पैसे व्याजासह चेकद्वारे व स्वामी विवेकानंद पतपेढीत त्यांच्या खात्यावर स्वतः भरुन परत केले आहेत. आता तुझे माझ्याकडे काही घेणे बाकी नाही असे सांगितले. यावरून सुनिल चौधरी यांना राग आल्याने त्याने हॉटेलवर येऊन अश्लील शिवीगाळ केली आणि धक्काबुक्की केली. याप्रकरणी अवधेश वाजपेयी यांनी दिलेल्या फिर्यादीवरून धरणगाव पोलीस स्थानकात सुनील चौधरी यांच्या विरुद्ध गुन्हा दाखल करण्यात आला आहे. तसेच पुढील तपास पोलीस उपनिरीक्षक संतोष पवार हे करीत आहे.
