अहमदाबाद (वृत्तसंस्था) पंजाब विधानसभा निवडणुकीत दणदणीत विजय मिळवल्यानंतर अरविंद केजरीवाल यांच्या आम आदमी पक्षाने (Arvind Kejriwal Aap) आता आपला मोर्चा गुजराकडे वळवला आहे. पक्षाचे गुजरात प्रभारी डॉ. संदीप पाठक यांनी आता निवडणूक झाल्यास ‘आप’ला गुजरातमध्ये ५८ जागा मिळू शकतात, असा दावा करत राजकीय वर्तुळात खळबळ उडवून दिली आहे.
येत्या निवडणुकीत गुजरातमध्ये पक्षाला ५८ जागा मिळतील, असं आपचा अंतर्गत सर्व्हे सांगतो. पक्षानं एका एजन्सीच्या माध्यमातून सर्वेक्षण केल्याचं आपचे प्रदेश प्रभारी डॉ. संदीप पाठक यांनी सांगितलं. काँग्रेसच्या असंतुष्ट ग्रामीण मतदारांची आपला साथ मिळेल. यासोबतच शहरी भागातील गरीब आणि मध्यम वर्गातील मतदारही आपकडे वळतील अशी माहिती सर्वेक्षणातून समोर आली आहे.
सध्याच्या घडीला आम्ही अशा स्थितीत आहोत की विधानसभेच्या ५८ जागा जिंकू शकतो, असं पाठक म्हणाले. ‘ग्रामीण गुजरातमधील मतदार आम्हाला मतदान करतील. शहरातील गरीब आणि मध्यम वर्गाला बदल हवा आहे. तो आम्हाला मतदान करेल, असं पाठक यांनी सांगितलं. पंजाबमध्ये आपनं दणदणीत विजय मिळवला. त्या विजयात पाठक यांचं महत्त्वाचं योगदान आहे. पंजाबमधून आपनं त्यांना राज्यसभेवर पाठवलं आहे.
कॉंग्रेस भाजपचा पराभव करू शकत नाही, असं ग्रामीण जनतेला वाटतं. त्यामुळे तिथला काँग्रेसचा मतदार आपकडे वळेल. सध्याची ही स्थिती आहे आणि निवडणूक जसजशी जवळ येईल, तशी आपकडे वळणाऱ्या मतदारांची संख्या वाढेल, असा विश्वास त्यांनी व्यक्त केला. भाजप सरकारनं राज्यात केलेल्या सर्वेक्षणातून आपला ५५ जागा मिळतील अशी आकडेवारी समोर आल्याचा दावाही त्यांनी केला.
