शिरपुर (वृत्तसंस्था).तालुक्यातील जोयदा शिवारातील एका शेतात विहिर धसून दाम्पत्य दाबले गेल्याने ठार झाल्याची घटना घडली आहे. सुदैवाने नातवासह आजी सुखरुप बचावले. तब्बल ४ तासानंतर जेसीबी मशिनद्वारे दाम्पत्याचे मृतदेह विहिरीतून बाहेर काढण्यात आले.
शिरपूर तालुक्यातील सांगवी येथील रहिवासी रेबा पांगल्या पावरा (५०) व त्यांची पत्नी मिनाबाई रेबा पावरा (४५) हे दाम्पत्य जोयया शिवारातील लाल मातीजवळ स्वतःच्या शेतात झोपडीवजा घरात राहत होते. काल (दि.२७) सकाळपासून रेवा व मिनाबाई हे दोघे शेतात ज्वारी पेरणीचे काम करीत होते. मात्र, दुपारी १२ वाजेच्या सुमारास मिनाबाई यांचे पोट अचानक दुखू लागल्यामुळे दोघे काहीवेळ झोपडीत चहा पिण्यासाठी आले. त्यानंतर दोघे शिरपूर येथे उपचारासाठी जाणार होते. त्यामुळे शेजारी राहणारे भिकला रिच्या पावरा व संतुबाई भिकला पावरा (५०) या दोघांना उर्वरीत पेरणीचे काम करण्यास सांगितले होते.
भिकला पावरा, संतुबाई पावरा, त्यांचा नातु तेजस किरण पावरा (दीड वर्ष) हे तिघे रेबा पावरा यांच्या झोपडीजवळ थांबले होते. विहिरीतून आला मोठा आवाज चहा होत असतांना दुपारी १२.३० वाजता अचानक विहिरीतून मोठा आवाज आला. त्यामुळे रेबा व मिनाबाई हे दोघे विहिरीकडे धावले. त्यावेळी विहिरीचा काही भाग धसू लागला. रेबा व मिनाबाई पावरा हे दोघे विहिरीजवळ उभे असतांनाच काही क्षणातच विहिर धसली व दोघे पती-पत्नी विहिरीत पडल्याने ढिगाऱ्याखाली दाबले गेले. त्यावेळी संतुबाई पावरा तेजस पावरा, भिकला पावरा हे तिघे देखील विहिरीजवळ गेले असता संतुबाई पावरा या देखील कमरेपर्यंत मातीच्या ढिगाऱ्यात बुजल्या गेल्यात. त्यांनी नातवाला डोक्यावर धरल्यामुळे तो सुखरुप वाचला. त्या दोघांना भिकला पावरा यांनी माती उपसून सुखरूप बाहेर काढले. मात्र, रेखा व मिनाबाई हे दोघे मातीच्या ढिगाऱ्याखाली पूर्णतः गाडले गेले होते. त्यामुळे त्यांना बाहेर काढणे शक्य झाले नाही.
घटनेची माहिती भिकला पावरा यांनी जवळील रहिवाशांसह जोयदा व सांगवी गावात कळविली. त्यामुळे घटनास्थळी मोठी गर्दी जमा झाली. महसूल अधिकाऱ्यांसह पोलीस यंत्रणाही घटनास्थळी दाखल झाली. पीड ते दोन तासानंतर जेसीबी मशिन आणण्यात आले. सुमारे चार तासांनी दुपारी ४.३० वाजता विहिरीतून रेवा व मिनाबाई पावरा या दोघांचे मृतदेह बाहेर काढण्यात यश आले. तोपर्यंत गटविकास अधिकारी संजय सोनवणे, नायब तहसिलदार अधिकार पेंढारकर, मंडळ अधिकारी प्रवीण मराठे, तलाठी प्रकाश पावरा, सरपंच शिला पावरा, ग्रामसेवक ईश्वर पावरा तसेच शिरपूर तालुका पोलिसांनी घटनास्थळी भेट देवून माहिती जाणून घेतली. दाम्पत्याचे मृतदेह शिरपूर उपजिल्हा रुग्णालयात दाखल करण्यात आले. तसेच संतुबाई पावरा, त्यांचा नातु तेजस पावरा यांनाही उपचारासाठी रुग्णालयात दाखल करण्यात आले. आ. अमरिशभाई पटेल यांचे स्वीय सचिव अशोक कलाल, जि.प. सदस्य योगेश बादल यांनी रुग्णालयात भेट देवून जखमींची विचारपूस केली.
