जळगाव (प्रतिनिधी) पती ड्युटीवर गेले होते तर त्यांची पत्नी कामानिमित्त बाहेर गेलेल्या असल्याने घर बंद असल्याची संधी साधत चोरट्यांनी घराचे कुलूप तोडून तब्बल २ लाख २९ हजारांचा ऐवज लांबविल्याची घटना शहरातील सुमारास महाबळ परिसरातील परिजात कॉलनीत घडली. याप्रकरणी रामानंद नगर पोलिसात गुन्हा दाखल करण्यात आला आहे.
शहरातील महाबळ परिसरातील पारिजात कॉलनीमध्ये महेश विनायक वाणी हे आपल्या कुटुंबियांसह वास्तव्यास आहेत. दि. ७ ऑगस्ट रोजी सकाळी ते नेहमीप्रमाणे ड्युटीवर निघून गेले तर त्यानंतर त्यांच्या पत्नी घराला कुलूप लावून काही कामानिमित्त बाहेर गेल्या होत्या. घराला कुलूप असल्याची संधी साधत चोरट्यांनी दुपारी ११.३० ते ३ वाजेच्या दरम्यान, घराचा कडीकोयंडा व कुलूप तोडून घरातप्रवेश केला. त्यानंतर कपाटात ठेवलेले सोने चांदीचे दागिने आणि रोकड असा एकूण २ लाख २९ हजारांचा मुद्देमाल चोरुन तेथून पसार पोलिसांना झाले.
चोरट्यांनी महेश वाणी यांच्या घरातून ६० हजार रुपये किमतीची २० ग्रॅम वजनाची सोन्याची मंगलपोत, १५ हजार रुपये किमतीचे ५ ग्रॅम वजनाचे ५ सोन्याचे कर्णफुले, ३ ग्रॅम वजनाच्या सोन्याच्या दोन अंगठ्या १ ग्रॅम, दीड ग्रॅम व ३.८ ग्रॅम वजनाच्या सोन्याच्या अंगठ्या, १५ ग्रॅमची गळ्यातील चैन, ५ ग्रॅमची अंगठी, चांदीची कुयरी, चांदीची वाटी, चांदीच्या साखळ्या, चांदीचा गोप, जोडवे, डायमंड लावलेली ५ ग्रॅमची अंगठी, स्मार्ट वॉच, दोन मनगटी घड्याळ यासह रोख १० हजार रुपये असा एकूण दोन लाख २९ हजार रुपये किमतीचा मुद्देमाल चोरट्यांनी चोरुन नेला.
चोरीच्या घटनेची माहिती मिळताच उपविभागीय अधिकारी संदीप गावित, रामानंद नगर पोलीस ठाण्याच्या पोलीस निरीक्षक शिल्पा पाटील यांच्यासह गुन्हे शोध पथकातील कर्मचाऱ्यांनी घटनास्थळी भेट देऊन पाहणी केली. त्यानंतर पोलिसात गुन्हा दाखल करण्यात आला आहे. पुढील तपास पोलिस उपनिरीक्षक गोपाल देशमुख हे करीत आहेत.
