नशिराबाद (प्रतिनिधी) – चिमुकल्याच्या शाळेच्या प्रवेशासाठी गेलेल्या विवाहितेची भरदिवसा कोयत्याने सपासप वार करून हत्या करण्यात आल्याची थरारक घटना सोमवारी नशिराबाद येथील खंडेराव मंदिरासमोर घडली. दारूच्या नशेत पत्नीच्या चारित्र्यावर संशय घेणाऱ्या पतीने हे हत्याकांड केल्याची प्राथमिक माहिती समोर आली असून नशिराबाद पोलिसांनी अवघ्या काही अर्ध्या तासात शिताफीने आरोपीला जेरबंद केले.
मिळालेल्या माहितीनुसार, मंदाबाई जाधव (वय २८) या नशिराबाद येथील रामा सोमा बागले यांच्या कन्या असून त्यांचा विवाह रायपूर येथील विकास जाधव (वय ३२) याच्याशी झाला होता. दाम्पत्याला एक मुलगा असून काही दिवसांपासून ते नशिराबाद येथे वास्तव्यास होते. विकास जाधव हा नेहमीच दारूच्या नशेत घरी येत असल्याने पती-पत्नीमध्ये वारंवार वाद होत असल्याची माहिती समोर आली आहे. पत्नीच्या चारित्र्यांवर संशय घेत असल्याने त्यांच्यात वाद वाढल्याचेही सांगितले जात आहे.
सोमवारी मंदाबाई जाधव या आपल्या मुलाच्या प्रवेशासाठी जिल्हा परिषद केंद्र शाळा, खालची आळी, नशिराबाद येथे गेल्या होत्या. प्रवेश प्रक्रिया पूर्ण करून त्या शाळेबाहेर पडताच, खंडेराव मंदिरासमोर हातात कोयता घेऊन दबा धरून उभा असलेल्या पती विकास जाधव याने त्यांच्यावर अचानक हल्ला चढविला. त्याने मानेवर सपासप वार केल्याने मंदाबाई या रक्ताच्या थारोळ्यात कोसळल्या. गंभीर
जखमांमुळे त्यांचा घटनास्थळीच मृत्यू झाला. भरदिवसा घडलेल्या या हत्याकांडामुळे परिसरात एकच खळबळ उडाली. घटनेची माहिती मिळताच भुसावळचे उपविभागीय पोलीस अधिकारी केदार बारबोले यांनी घटनास्थळी भेट देऊन पाहणी केली. नशिराबाद पोलीस ठाण्याच्या सहाय्यक पोलीस निरीक्षक योगिता नारखेडे यांच्या मार्गदर्शनाखाली पोलिसांनी तात्काळ शोधमोहीम राबविली. आरोपी विकास जाधव हा परिसरातील एका जुन्या पडक्या घरात लपून बसल्याची माहिती मिळताच पोलिसांनी
शिताफीने सापळा रचून त्याला तेथून ताब्यात घेतले. अटक करण्यात आली तेव्हा आरोपी दारूच्या नशेत असल्याची माहिती पोलिस सूत्रांनी दिली. ही कारवाई सहाय्यक पोलीस निरीक्षक योगिता नारखेडे, पोलीस उपनिरीक्षक विजय कोळी, सहाय्यक पोलीस उपनिरीक्षक राजेश मेंढे, शरद सोनार, शिवदास चौधरी, राजेंद्र ठाकरे, कमलाकर बागुल, पोलीस हवालदार शरद भालेराव, गिरीश शिंदे, प्रशांत गिरणारे, अनिल देशमुख, गुणवंत देशमुख, चंद्रकांत पाटील, पोलीस अंमलदार विजय अहिरे, सागर बिडे, पंकज सोनवणे, भरत बाविस्कर, विठ्ठल मुंडे, रुपेश साळवे, गणेश गायकवाड तसेच महिला पोलीस अंमलदार मोनाली दहीभाते व सोनी तडवी यांच्या पथकाने यशस्वीरीत्या पार पाडली. या प्रकरणी नशिराबाद पोलीस ठाण्यात गुन्हा दाखल करण्याची प्रक्रिया सुरू असून हत्येमागील नेमके कारण व इतर बाबींचा सखोल तपास पोलीस करीत आहेत. चिमुकल्याच्या शाळा प्रवेशाच्या आनंदावर विरजण घालणाऱ्या या हृदयद्रावक घटनेमुळे नशिराबाद परिसरात हळहळ व्यक्त होत आहे.
