मुंबई (वृत्तसंस्था) उद्धव ठाकरेंनी मुख्यमंत्रीपदाच्या शपथविधीच्या दुसऱ्याच दिवशी एका बिल्डरला ३४५ कोटी गिफ्ट दिले, असा आरोप किरीट सोमय्या यांनी मुंबईत आयोजित पत्रकार परिषदेत करून खळबळ उडवून दिली आहे. एवढेच नव्हे तर, मी दिलेली कागदपत्रं चुकीची असतील तर जेलमध्ये टाका. पण उद्धव ठाकरेंमध्ये हिंमत नाही. शिवसेनेत हिंमत असेल तर किरीट सोमय्याला हात लावून दाखवा, असे जाहीर आव्हान किरीट सोमय्या यांनी दिले आहे.
किरीट सोमय्या म्हणाले की, ठाकरे सरकार म्हणजे रिअल इस्टेटमध्ये भूखंडाचं श्रीखंड करण्यात गुंतलेले सरकार दिसत आहे. मी याआधी दहिसर जमीन घोटाळ्याचा विषय काढला होता. संजय राऊत ऐकत असतील तर त्यांनी स्पष्ट ऐकावे. जी जमीन २ कोटी ५५ लाखांत अल्पेश अजमेरा बिल्डरने घेतली ती ९०० कोटीत विकत घेण्यासाठी मुंबई महापालिका निघाली आहे. यामधील ३५४ कोटी आधीच दिले आहेत. किरीट सोमय्या यांनी यावेळी तीन घोटाळ्यांची माहिती देत त्याविरोधात कायदेशीर कारवाई सुरु कऱण्यात आल्याचेही सांगितले. याच्यासंबंधी संजय राऊत किंवा शिवसेनेच्या कोणत्याही नेत्यामध्ये हिंमत असेल तर बोलावे असे आव्हानही यावेळी त्यांनी दिले. ठाकरे सरकारला एक वर्ष पूर्ण झाल्यानंतर २८ नोव्हेंबरला आणखी तीन घोटाळ्यांची कायदेशीर कारवाई सुरु करणार आहे. यासंबंधी मुंबई हायकोर्टात दोन जनहित याचिका आणि एक लोकायुक्तांकडे दाखल होणार आहे, अशी माहिती यावेळी किरीट सोमय्या यांनी दिली.
मी आणखी नऊ सातबारा उतारे सादर करत आहेत. परवा एक सातबारा दिला तर लोक मला येऊन माहिती देतात, अधिकारी देत नाहीत. ३० जमिनीचे व्यवहार अन्वय नाईक कुटुंबासोबत रश्मी ठाकरे यांनी केले आहेत. आणखी माहिती हवी असेल तर देतो. एकंदर मान्यवर ठाकरे परिवाराचे ४० जमीन व्यवहार झाले आहेत त्यापैकी ३० अन्वय नाईक कुटुंबासोबत आहेत, असा दावा किरीट सोमय्या यांनी केला आहे. उद्धव ठाकरेंमध्ये हिंमत असेल तर त्यांनी उत्तर द्यावे. ४० पैकी ३० जमीन व्यवहार अन्वय नाईक कुटुंबासोबत का आहेत? याचे उत्तर उद्धव ठाकरेंनी द्यावे, असेही सोमय्या म्हणाले.
