साकळी ता. यावल (प्रतिनिधी) साकळीसह परिसरात शासनाने गुटखावर बंदी घातलेली असतांना शहरात खुलेआम गुटखा विक्री होत असल्याचे चित्र दिसत आहे. गुटखा विक्रीचा व्यवसाय करणारे माफिया दिवसेंदिवस गब्बर होत असून त्यांच्याकडे अन्न व औषध विभागातसहित संबंधितांचे अर्थपूर्ण दुर्लक्ष होत असल्याचे बोलले जात आहे. त्यामुळे परिसरातून संताप व्यक्त केला जात आहे.
महाराष्ट्र शासनाने मोठा गाजावाजा करत राज्यात गुटखाबंदी केली. त्यावेळी अनेक स्तरातून या निर्णयाचे स्वागत करत आनंद व्यक्त करण्यात आला मात्र हा आनंद अवघ्या काही दिवसांसाठीच राहिला. बंदीनंतर या क्षेत्रात गुटखामाफियांची साखळी तयार होऊन आज अगदी खेड्यापाड्यात बिनधास्तपणे छोट्यातल्या छोट्या टपरीवरही सहज गुटखा उपलब्ध होतो . त्याचाच प्रत्यय साकळीसह परिसरात येत आहे. परिसरातील अनेक गावांत छोट्या व मोठ्या पॅकिंगमध्ये गुटखा विकला जात आहे . तरी संबंधित विभागाने याकडे लक्ष देऊन त्वरित कठोर कारवाई करावी अशी मागणी होत आहे.
