चाळीसगाव (प्रतिनिधी) सिनेस्टाईल पाठलाग करून गुटख्याने भरलेला कंटेनर चाळीसगाव ग्रामीण पोलीस स्थानकाच्या पथकाने पकडल्यामुळे शहरासह जिल्ह्यात प्रचंड खळबळ उडाली आहे. या कंटेनरमध्ये ८२ लाखांचा गुटखा जप्त करण्यात आला असून कंटेनर चालकास अटक करण्यात आलीय.
यासंदर्भात अधिक असे की, चाळीसगाव ग्रामीण पोलीस स्टेशनचे पथक तपासकामी मालेगाव रोड येथे गेले होते. यावेळी मालेगाव रोडवरील बेलगंगा कारखान्याजवळ कन्टेनर (क्र. एचआर-३८- एबी-६०९६) हे संशयीतरीत्या भरधाव वेगाने जात असल्याचे पथकाला दिसले. यामुळे सदर पथकाने कंटेनरला थांबवण्याचा प्रयत्न केला. परंतु कंटेनर भरधाव वेगाने पुढे निघून गेले.
पोलीस पथकाने कंटेनरचा पाठलाग करून मुंबई-आग्रा हायवेवरील चाळीसगाव फाट्यावर सदरचा कंटेनर थांबविला. वाहनातील मालाबाबत चालकास विचारपूस केली असता त्याने उडवाउडवीची उत्तरे दिली. या कंटेनरची पाहणी केल्यानंतर त्याला लॉक लावलेले होते. चाळीसगाव ग्रामीण पोलीसांनी कंटेनर व चालकास पोलीस स्टेशनला आणून पोलीस स्टेशनला शासकीय पंचांना पाचारण करुन कंटेनरचे लॉक उघडून पाहणी केली असता त्यात एकूण १३० प्लास्टीक वारदानात एकूण किंमत ८२,२५,१०० रुपये किंमतीचा गुटखा मिळून आला. यामुळे सदरचा गुटखा व २०,००,००० रुपयांचे कंटेनर असा एकूण १,०२,२५,१०० रु. किमतीचा माल पंचांसमक्ष जप्त करण्यात आला असून कंटेनर चालकास ताब्यात घेण्यात आले आहे.
यांनी केली कारवाई
ही कार्यवाही पोलीस अधीक्षक डॉ. प्रविण मुंढे, अपर पोलीस अधीक्षक रमेश चोपडे, उपविभागीय पोलीस अधिकारी कैलास गावडे यांच्या मार्गदर्शनाखाली पोलीस निरीक्षक संजय ठेंगे, सपोनि रमेश चव्हाण, सपोनि धरमसिंग सुंदरडे, पोलीस उपनिरीक्षक लोकेश पवार, पोना नितीन किसन आमोदकर, गोवर्धन राजेंद्र वोरसे, शांताराम सिताराम पवार, प्रेमसिंग राठोड यांच्या पथकाने केली आहे. पोना नितीन किसन आमोदकर, यांनी दिलेल्या फिर्यादवरुन गुन्हा दाखल करण्यात आलेला आहे. पुढील तपास पोलीस निरीक्षक संजय ठेंगे यांचे मार्गदर्शनानुसार पोलीस उप निरीक्षक लोकेश पवार हे करीत आहेत.
