जळगाव (प्रतिनिधी) – कुटुंबियांसह आडगाव येथे गेलेल्या पोलीस पाटील धर्मराज रामदास बाविस्कर (वय ४०) यांच्या घराचे कुलूप तोडून चोरट्यांनी डल्ला मारला. याठिकाणाहून चोरट्यांनी १० ग्रॅम वजनाची सोन्याची मंगलपोत, ५ ग्रॅमची अंगठी व १५ हजारांची रोकड असा एकूण १ लाख २७हजाराचा ऐवज लंपास केला. ही घटना दि. १५ मे रोजी सकाळच्या सुमारास जूना असोदा रोडवरील गजानन नगरात घडली. याप्रकरणी शनिपेठ पोलिसात गुन्हा दाखल करण्यात आला आहे.
यावल तालुक्यातील आडगाव येथील पोलीस पाटील धर्मराज रामदास बाविस्कर हे जूना असोदा रोडवरील गजानन नगरात वास्तव्यास आहे. दि. १४ मे रोजी रात्री ८ वाजता ते कुटुंबियांसह घराला कुलूप लावून त्यांच्या मूळगावी आडगाव येथे गेले होते. मध्यरात्रीच्या सुमारास चोरट्यांनी बाविस्कर यांच्या बंद घराचा दरवाजा तोडून घरात प्रवेश केला. त्यांतर घरातील सामान अस्ताव्यस्त फेकून देत त्यांनी घरातील एका कपड्याच्या बॅगेत ठेवलेले सोन्याचे दागिने आणि रोकड चोरुन नेली. दि. १५ मे रोजी सकाळी त्यांच्या शेजारी राहणाऱ्या नातेवाईक पवन ठाकरे याने बाविस्कर यांना फोन करुन घरफोडी झाल्याची माहिती दिली.
कपड्यांच्या बॅगमधून लांबवला ऐवज
घरात चोरी झाल्याचे कळताच धर्मराज बाविस्कर हे तात्काळ घरी पोहचले. त्यांनी घरात पाहणी केल्यानंतर चोरट्यांनी घरातील सामान अस्ताव्यस्त फेकलेला होता. तर बेडरुमधील कपड्याच्या बॅगेतून १० ग्रॅम वजनाची सोन्याची पोत, ५ ग्रॅमची अंगठी व १५ हजारांची रोकड असा एकूण १ लाख २७ हजार रुपयांचा ऐवज चोरुन नेल्याच्याची खात्री झाली. त्यांनी लागलीच शनिपेठ पोलिसात तक्रार दिली असून त्यानुसार अज्ञात चोरट्याविरुद्ध गुन्हा दाखल करण्यात आला आहे. तपास पोहेकॉ विजय खैरे हे करीत आहे.
