जळगाव (प्रतिनिधी) शहरातील भोईटे नगरातील शिक्षकाच्या घरात चोरट्यांनी डल्ला मारीत तेथून रोख रकमेसह सोने चांदीचे दागिने असा एकूण ३ लाख १७ हजार रुपयांचा ऐवज चोरुन नेला. ही घटना सोमवारी ९ रोजी सकाळी ७ वाजेच्या सुमारास उघडकीस आली. याप्रकरणी शहर पोलिसात अज्ञात चोरट्यांविरुद्ध गुन्हा दाखल करण्यात आला आहे.
शहरातील भोईटे नगरातील गौरी प्राईड अपार्टमेंटमध्ये मयूर बाळासाहेब देशमुख हे कुटुंबियांसह वास्तव्यास आहे. देशमुख हे कुटुंबियांसह चोपडा तालुक्यातील अडावद येथे गेले होते. दरम्यान, दोन दिवसांपासून त्यांचे घर बंद असल्याची संधी साधत चोरट्यांनी त्यांच्या घराच्या गेटचा कडीकोयंडा तोडून आत प्रवेश केला. त्यानंतर घरातून चोरट्यांनी ७० हजार रुपयांच्या रोकडसह ३ लाख १७ हजार २०० रुपयांचा ऐवज चोरुन नेला. देशमुख यांचे शेजारी राहणाऱ्यांनी ९ सप्टेंबर रोजी सकाळी ७ वाजता त्यांना फोन करुन तुमच्या घरात चोरी झाल्याची माहिती दिली. त्यानुसार लागलीच मयूर देशमुख हे कुटुंंबियांसह घराकडे येण्यासाठी निघाले. चोरट्यांनी मयूर देशमुख यांच्या घरातील बेडरुमध्ये असलेल्या कपाटातील कपडे आणि वस्तू अस्तव्यस्त फेकलेल्या होत्या. तसेच कपाटातील तिजोरीचे लॉक तोडून चोरटांनी त्यामध्ये ठेवलेली रोकड आणि सोने चांदीचे दागिने चोरुन नेले. त्यानुसार त्यांनी लागलीच घटनेची माहिती शहर पोलिसांना दिली. शहर पोलीस ठाण्यातील गुन्हे शोध पथकातील कर्मचाऱ्यांनी घटनास्थळी धाव घेत पाहणी केली. त्यानंतर अज्ञात चोरट्यांविरुद्ध गुन्हा दाखल करण्यात आला आहे.
