जळगाव (प्रतिनिधी) रोटरी क्लब जळगाव ईस्टचा पदग्रहण सोहळा बुधवारी दुपारी गणपतीनगरातील रोटरी हॉलमध्ये मोठ्या थाटात झाला. मावळते अध्यक्ष भावेश शहा यांनी नूतन अध्यक्ष वीरेंद्र छाजेड यांना, तर मावळते सचिव हितेश्वर मोतीरामाणी यांनी नूतन सचिव प्रणव मेहता यांना पदभार सोपवला. या क्लबचे २५ व्या वर्षात पदार्पण होत आहे. या सिल्व्हर ज्युबलीनिमित्त लोगोचे अनावरण करीत व केक कापून विशेष उत्सव साजरा करण्यात आला.
हा पदग्रहण सोहळा पीडीजी महेश मोकालकर व विष्णू भंगाळे यांच्या मुख्य उपस्थितीत झाला. मावळत्या पदाधिकार्यांनी नूतन पदाधिकार्यांकडे पदभार सोपविताना त्यांना कॉलर, पीन आणि चार्टर प्रदान केले. मावळते अध्यक्ष भावेश शहा आणि मावळते सचिव हितेश्वर मोतीरामाणी यांनी त्यांच्या कार्यकाळातील वर्षभरामधील कामाकाजाचा अहवाल सादर केला.
समाजोपयोगी कार्य एकजुटीने यशस्वी करा
वीरेंद्र छाजेड यांनी क्लबच्या या अगोदरच्या उल्लेखनीय कार्याची माहिती दिली. तसेच त्यांच्या कार्यकाळातील आगामी वर्षात राबविण्यात येणार्या सेवाभावी विविध उपक्रमांची माहिती दिली. वर्षभरात भव्य वृक्षारोपण, मेगाआरोग्य शिबिर, विद्यार्थ्यांसाठी विविध कार्यक्रम, लॉकडाऊनमुळे बेरोजगार झालेल्या गरजूंना किराणा किट वाटप, जलसंधारण, पर्यावरण विषयक अनेक उपक्रम आदी राबविण्यात येणार असल्याचेही छाजेड यांनी सांगितले. तर ‘साथी हाथ बढाना’ या घोषवाक्यानुसार सर्वांनी एकजुटीने, एकदिलाने समाजोपयोगी कार्यात सहभागी होऊन ते यशस्वी करावे, असे आवाहनही त्यांनी केले. प्रणव मेहता यांनी देखील आगामी वर्षातील कार्याच्या नियोजनाबाबत माहिती दिली. हा क्लब आता केवळ इन्स्टिट्यूट सारखा मर्यादित राहिला नसून आता त्याचे स्वरुपात एका विद्यापीठासारखे झाले आहे, असे मत माजी अध्यक्ष विनोद भोईटे-पाटील यांनी व्यक्त केले.
२५ वर्षांच्या प्रवासाला सॅल्यूट
या क्लबचे २५ व्या वर्षात पदार्पण होत असल्याने क्लबच्या आतापर्यंतच्या प्रवासाला आणि पदाधिकार्यांच्या यशस्वी कार्याला, त्यांच्या योगदानाला सॅल्यूट असल्याचे मत पीडीजी महेश मोकालकर यांनी व्यक्त केले. रोटरीत सत्कर्माचे दर्शन होते. मनापासून केलेल्या प्रामाणिक प्रयत्नामुळे कामकाजात पारदर्शकता येते. त्यामुळे आपली रोटरीपासून रोटेरियनकडे वाटचाल होते. दुसर्यांसाठी चांगला विचार कराल, तर आपलेही चांगले होईल. रोटरीच्या कार्यात सक्रिय सहभाग घेऊन योगदान द्या, असे आवाहनही मोकालकर यांनी केले. विष्णू भंगाळे यांनी डी.जी.रमेश मेहर यांच्या संदेशाचे वाचन केले.
इंट्राक्ट क्लबचा शुभारंभ
रोटरी क्लब जळगाव ईस्ट अंतर्गत इंट्राक्ट क्लबचा शुभारंभ झाला. या क्लबच्या अध्यक्षपदाचे सूत्र दिव्य छाजेड व सचिव पदाचे सूत्र धुव्र अग्रवाल यांनी स्वीकारले. प्रारंभी सुहानी छाजेड या बालिकेने गणेश वंदना आणि प्रियंका छाजेड व प्रणाली साखला यांनी स्वागतगीत सादर केले. सूत्रसंचालन ममता कांकरिया यांनी केले. मान्यवरांचा परिचय डॉ.जगमोहन छाबडा यांनी करुन दिला. आभार संग्रामसिंग सूर्यवंशी यांनी मानले.
यावेळी लक्ष्मीकांत मणियार, डॉ.गोविंद मंत्री, संगीता पाटील, डॉ.विवेक वडजीकर, हनुमानमल छाजेड, गौरादेवी छाजेड, नवरतन चोरडिया, सुरेंद्र छाजेड, रवींद्र छाजेड, उमंग मेहता, स्वप्निल जाखेटे, नितीन इंगळे, संदीप असोदेकर, संदीप शर्मा, संजय गांधी, वर्धमान भंडारी, नीरज अग्रवाल, रजनीश लाहोटी, अभय कांकरिया, बाबूशेठ श्रीश्रीमाळ, प्रखर मेहता, अभय कांकरिया, अभय कांकरिया, डॉ.राहुल भंसाळी, डॉ.अमेय कोतकर, राजेश साखला, सुनील शहा, पूजा अग्रवाल, डॉ.मयुरी पवार, रुपाली शहा, मोनिका मेहता, नूतन कक्कड, नेहा संचेती आदी उपस्थित होतेे.
