जळगाव (प्रतिनिधी) – केंद्र व राज्य शासनाच्या विविध योजनांची माहिती देणारे ‘प्रगतिशील महाराष्ट्र-2026’ प्रदर्शन अमळनेर येथील कलागुरू मंगल भवन येथे बुधवारी (दि.7) सुरू झाले. या प्रदर्शनातील महावितरणच्या दालनाचे उद्घाटन वस्त्रोद्योगमंत्री संजय सावकारे यांच्या हस्ते झाले.
यावेळी खासदार स्मिता वाघ, आमदार नंदकुमार महाजन, आमदार अमोल जावळे यांची प्रमुख उपस्थिती होती. महावितरणच्या दालनात प्रधानमंत्री सूर्यघर मोफत वीज योजना, स्वयंपूर्ण महाराष्ट्र आवासीय रूफ टॉप सोलर योजना, मुख्यमंत्री सौर कृषी वाहिनी योजना-2.0, मागेल त्याला सौर कृषिपंप योजनेसह स्मार्ट मीटरच्या फायद्याची माहिती देण्यात येत आहे. वीज ग्राहकांनी या योजनांचा लाभ घ्यावा, असे आवाहन वस्त्रोद्योगमंत्री संजय सावकारे यांनी केले. जळगाव परिमंडलाचे मुख्य अभियंता आय.ए. मुलाणी, अधीक्षक अभियंता मदन सांगळे यांच्या मार्गदर्शनाखाली हे दालन उभारण्यात आले आहे. यावेळी सांघिक कार्यालयाचे उपमुख्य जनसंपर्क अधिकारी प्रवीण स्थूल, धरणगाव विभागाचे कार्यकारी अभियंता नीलेश सोनगिरे, जळगाव परिमंडलाचे जनसंपर्क अधिकारी ज्ञानेश्वर आर्दड, कार्यकारी अभियंता, अमळनेरचे अतिरिक्त कार्यकारी अभियंता ज्ञानेश्वर अंबाडकर, उपकार्यकारी अभियंता मनोज भावसार, सहायक अभियंता हितेंद्र बढे, मनोज वाडिले, विनायक बोरसे, हेमंत सैदाणे, नितीन ठवकर, मोहन नेवाळे, भाऊसाहेब महाजन, तंत्रज्ञ दीपक अहिरे, सुषमा हजारे यांनी ग्राहकांनी सर्व योजनांची माहिती दिली. विद्युत सुरक्षा व वीजबचतीबाबत शालेय व महाविद्यालयीन विद्यार्थ्यांचे प्रबोधन करण्यात आले. यावेळी प्रश्नमंजूषा स्पर्धा घेण्यात येऊन विद्यार्थ्यांना बक्षिसे देण्यात आली. दालनात ग्राहकांच्या तक्रारींसाठी स्वतंत्र नोंदवही ठेवून त्यावर कार्यवाही केली जात आहे. 9 ऑक्टोबरपर्यंत हे प्रदर्शन खुले आहे. नागरिकांनी यात महावितरणच्या दालनात भेट देऊन योजनांचा लाभ घ्यावा, असे आवाहन करण्यात आले आहे.
