नवी दिल्ली (वृत्तसंस्था) बटला हाऊस प्रकरणात दिल्लीतील पोलिस निरीक्षक मोहन चंद शर्मा यांच्या मृत्यू प्रकरणात अखेर निकाल समोर आला आहे. दिल्लीतील साकेत कोर्टाने सोमवारी इंडियन मुजाहिद्दीनच्या अतिरेकी असलेल्या आरिज खानला या प्रकरणात फाशीची शिक्षा सुनावली आहे.
तब्बल १३ वर्षे न्यायाच्या प्रतिक्षेत असलेल्या मोहन चंद शर्मा यांच्या पत्नीला अखेर न्याय मिळाला आहे. या निकालानंतर त्यांच्या पत्नीनेही पुढे येत कोर्टाच्या निकालावर आपली प्रतिक्रिया दिली आहे. बाटला हाऊस प्रकरणात आपल्या पतीला गमावलेल्या मोहन चंद शर्मा यांच्या पत्नीने अनेक वर्षानंतर न्याय मिळाल्याचे समाधान व्यक्त केले आहे. कोर्टाने निकाल देताना हा रेयरेस्ट ऑफ द रेअयर अशा श्रेणीतील गुन्हा असल्याचे निकालात नमुद केले आहे. न्यायालयाने शिक्षेचा सुनावणीचा निर्णय सायंकाळी ४ वाजेपर्यंत राखून ठेवला होता. पोलीस निरीक्षक मोहनचंद शर्मा यांच्या हत्येप्रकरणी आरिझ खानला फाशीची शिक्षा सुनावली जावी, अशी मागणी न्यायालयाकडे पोलिसांनी केली होती.
मागील सुनावणीत न्यायालयाने आरिझ खानला दोषी ठरवलं होतं. दिल्ली पोलिसांनी त्याला २०१८ मध्ये अटक केली होती. न्यायालयाने आरिझ खानला आर्म्स अॅक्ट आणि कलम ३०२, ३०७ अंतर्गत दोषी ठरवलं होतं. २००८ मध्ये घडलेल्या बाटला हाऊस एनकाउंटर प्रकरणानंतर आरिझ फरार झाला होता. त्यानंतर २०१८ मध्ये त्याला नेपाळमधून अटक करण्यात आली होती. आरिझ खानला बाटला हाऊस एनकाउंटरमध्ये जीव गमवावा लागलेल्या पोलीस निरीक्षक मोहन शर्माच्या हत्येसाठी दोषी ठरवण्यात आलं आहे. तसेच, पोलीस कर्मचारी बलवंत सिंह-राजवीर यांना देखील त्याने जीवे मारण्याचा प्रयत्न केला होता.
काय आहे बाटला हाउस एनकाउंटर ?
दिल्लीतील बाटला हाउसमध्ये १९ सप्टेंबर २००८ च्या सकाळी एनकाउंटर झाला होता. या घटनेच्या एका आठवड्यापूर्वी १३ सप्टेंबर २००८ ला दिल्लीतील ५ ठिकाणी सीरियल बॉम्ब स्फोट झाला होता. ५० मिनीटात झालेल्या या पाच स्फोटात ३९ जणांचा मृत्यू झाला होता. दिल्ली पोलिस या प्रकरणाचा तपास करत होते, तेव्हा ते बाटला हाउसमध्ये एल-१८ नंबर इमारतीच्या तिसऱ्या मजल्यावर पोहचले होते. तिथे इंडियन मुजाहिद्दीनच्या दहशतवाद्यांसोबत चकमक झाली. यात दोन दहशतवाद्यांना कंठस्नान घालण्याकत आले होते. तर, दोघांना अटक आणि एक फरार झाला होता.
