कोलोराडो (वृत्तसंस्था) एका अज्ञात व्यक्तीने सुपर मार्केटमध्ये अंदाधुंद केलेल्या गोळीबारात एका पोलिसासह दहा जणांचा मृत्यू झाल्याची घटना सोमवारी घडली. अमेरिकेतील कोलोराडोमध्ये असलेल्या बोल्डर येथील मार्केटमध्ये हा गोळीबार करण्यात आला. या घटनेत गोळीबार करणारा आरोपीही जखमी झाला असून, त्याला अटक करण्यात आल्याची माहिती पोलिसांनी दिली.
बोल्डर पोलीस विभागाचे प्रमुख कमांडर केरी यामागुची यांनी या घटनेविषयी माहिती दिली. तपास अधिकाऱ्यांनी तपास सुरू केला आहे. गोळाबार करण्यामागचा नेमका उद्देश काय होता याचा तपास सुरू आहे. घटनास्थळाची पाहणी केली जात असून, नक्की किती लोकांचा मृत्यू झाला आहे, हे अजून कळू शकलेलं नाही. या घटनेत अनेक लोकांचा मृत्यू झाला आहे. आणि दुःखद बाब म्हणजे मृतांमध्ये एक बोल्डरमधील पोलीस अधिकाऱ्याचाही समावेश आहे. असं यामागुची यांनी सांगितलं.
सुपरमार्केटमध्ये गोळीबाराचा आवाज ऐकून लोक इतरत्र पळू लागले. तसेच अनेक जण खाली पडलेले दिसले. हा धक्कादायक प्रकार परिसरातील सीसीटीव्हमध्ये कैद झाला असून फुटेज व्हायरल होत आहे. व्हिडीओमध्ये लोक रस्त्यावर पडलेले दिसत आहेत. स्थानिक पोलिसांना माहिती मिळताच त्यांनी घटनास्थळी येत सुपरमार्केटच्या संपूर्ण परिसराला वेढा घातला. स्थानिक पोलिसांच्या मदतीला ३ हेलिकॉप्टर्सही देण्यात आली होती. गोळीबारात एका पोलिसाचा मृत्यू झाला आहे.
