धरणगाव (प्रतिनिधी) शहरात असलेले प्राचीन साडेश्वर शिवमंदिर आणि भवानी माता मंदिर याठिकाणी जाण्यासाठी रस्ता व्हावा, अशी मागणी अनेक वर्षापासून भाविकांची आहे. आज जि.प. सदस्य प्रतापराव पाटील आणि शिंदे गटाच्या प्रतिनिधींनी परिसराची पाहणी करत तत्काळ हे रस्ते केले जातील, अशी माहिती दिली आहे.
साडेश्वर शिवमंदिर म्हणून धरणगाव तालुक्यात प्रसिद्ध आहे. भक्त त्या ठिकाणी दर्शनासाठी येत असतात. मात्र रस्ताच नसल्याने पावसाळ्यात त्या ठिकाणी भक्त जाऊ शकत नाही. हा रस्ता तयार करून द्यावा, अशी मागणी करणारे पत्र तहसीलदारांना दिले होते. या ठिकाणी काही वर्षांपूर्वी रस्त्याचे मोजमाप केले आहे. तसेच वारंवार या रस्त्यासाठी अर्जदार नगरपालिका प्रशासन, तहसीलदार, सार्वजनिक बांधकाम विभाग, प्रांतधिकारी यांच्याकडे मागणी करण्यात आली होती. या मागणीला प्रतिसाद देत जि.प. सदस्य प्रतापराव पाटील आणि शिंदे गटाच्या प्रतिनिधींनी परिसराची पाहणी केली. तसेच लवकरात लवकर या दोन्ही मंदिरांकडे जाणारा मंजूर करण्यात येईल असे आश्वासन आज जि.प. सदस्य प्रतापराव पाटील यांनी दिले आहे. यानंतर त्यांनी गांधी उद्यानातील कामाची देखील पाहणी करत कामाची माहिती जाणून घेतली. यावेळी माजी गटनेते पप्पू भावे,विजय महाजन, विलास महाजन, पवन महाजन, पिंटू देशमुख, बाळू जाधव, भैय्या महाजन यांच्यासह आदि पदाधिकारी देखील उपस्थित होते.
असे होणार रस्ते
धरणगाव-चोपडा रोडवरून गणेश ऑटोच्या पुढून साडेश्वर मंदिराकडे जाणारा एक कच्चा रस्ता आहे. या रस्त्यालगत असलेल्या नाल्याला संरक्षण भिंत बांधून बाजूला रस्ता तयार करून मंदिरा पर्यंत नेण्यात येणार आहे. तर भवानी माता मंदिराकडे जाणारा रस्ता पारोळा रोडपासून जोडण्यात येणार आहे. या दोघं रस्त्यांसाठी जिल्हा नियोजन मंडळातून लवकरच निधी उपलब्ध करून रस्त्याचे काम देखील लवकरात लवकर सुरु करण्यात येणार असल्याची माहिती जि.प. सदस्य प्रतापराव पाटील यांनी दिली आहे.
