चाळीसगाव (प्रतिनिधी) जळगाव जिल्ह्यात समाज माध्यमात व जनमानसात सुरु असलेल्या चर्चेच्या अनुषंगाने सखोल चौकशी होऊन तथ्य व सत्य समोर आणावे, अशी मागणी चाळीसगावचे आमदार मंगेश चव्हाण यांनी जळगाव जिल्हा पोलीस अधिक्षक यांना निवेदनद्वारे केली आहे.
आमदार मंगेश चव्हाण यांनी दिलेल्या निवेदनात म्हटले आहे की, काल दि. ८ नोव्हेंबर २०२१ रोजी सायंकाळी ४ वाजेपासून जळगाव शहरात एका अल्पवयीन मुलीवर अजिंठा शासकीय विश्रामगृह येथे लैंगिक अत्याचार झाला असून त्यात जिल्ह्यातील काही लोकप्रतिनिधी सहभागी असल्याची चर्चा मोठ्या प्रमाणात आहे. लोकप्रतिनिधी म्हणून प्रत्यक्ष भेटी, भ्रमणध्वनी या माध्यमातून माझ्यादेखील कानावर सदर घटनेची चर्चा आली. लोकशाहीचा चौथा स्तंभ असणाऱ्या पत्रकारितेचे आधुनिक स्वरूप ऑनलाईन पोर्टल्स, सोशल मिडिया यावर देखील सदर अल्पवयीन मुलीवर अत्याचार झाल्याच्या बातम्या वाचण्यात आल्या. त्यात विशेषतः लोकप्रतिनिधी व आमदारांचा उल्लेख वारंवार येत असल्याने जनमानसात संशयाचे व संभ्रमाचे वातावरण निर्माण झाले आहे. पत्रकारिता म्हणून त्यांना मिळालेल्या माहितीच्या अनुषंगाने सदर ऑनलाईन पोर्टल्स यांनी या बातम्या दिल्या असाव्यात ते त्यांचे कामच आहे. मात्र अश्या घटनांमध्ये दखल घेण्याचा, गुन्हा दाखल करून तपास करण्याचा अधिकार असणाऱ्या पोलीस यंत्रणेकडून याबाबत अधिकृत कुठलीही माहिती जाहीर करण्यात आलेली नाही.
लैंगिक अत्याचाराची घटना त्यातल्या त्यात अल्पवयीन मुलीवर झालेला अत्याचार ही समाजाला काळिमा फासणारी बाब आहे. ऑनलाईन पोर्टल्स व सोशल मिडिया यात आलेल्या अल्पवयीन मुलीवरील अत्याचाराच्या बातमीची आपण गंभीरपणे दखल घ्यावी व सदर प्रकरणाची तत्काळ सखोल चौकशी करून तथ्य व सत्य जनतेसमोर आणावे, तसेच या बातम्यांच्या अनुषंगाने जाहीर खुलासा जिल्ह्याचे पोलीस अधिक्षक या नात्याने आपण करावा, असे यात म्हटले आहे.
