जळगाव (प्रतिनिधी) – राज्यात गाजलेल्या घरकुल गैरव्यवहार प्रकरणी अत्यंत महत्वाच्या मूळ फाईल अभिलेख कक्षातून गहाळ झाल्याप्रकरणी गुन्हा दाखल करण्यात आला आहे. या गुन्ह्यात तपासधिकाऱ्यांनी सोमवारी महापालिकेतील अधिकाऱ्यांची भेट घेत या गुन्ह्याच्या अनुषंगाने माहिती जाणून घेतली. महापालिकेतील अधिकाऱ्यांनी लेखी उत्तर दिल्यानंतर या गुन्ह्याच्या तपासाची दिशा ठरणार आहे.
त्यानुसार, सन २००६ मधील घरकूल गैरव्यवहार प्रकरणाशी संबंधित गट क्रमांक ३३७/३ अ/१ आणि गट क्रमांक ३३७/३ अ/२ या जागांच्या नव्याने तयार करण्यात आलेल्या मूळ फाईलीही याच अभिलेख कक्षात सुरक्षित ठेवण्यात आल्या होत्या. त्या फाईली न्यायालयीन प्रक्रियेसाठी अत्यंत महत्त्वाच्या मानल्या जात आहेत. परंतू या मूळ फाईली अभिलेख कक्षातून गहाळ झाल्याचे समोर आल्यानंतर शहर पोलीस ठाण्यात अज्ञात व्यक्तीविरुद्ध चोरीचा गुन्हा दाखल करण्यात आला आहे. दि. ३१ जानेवारी २०२४ ते दि. २ जुलै २०२६ या कालावधीत अज्ञात व्यक्तीने रेकॉर्ड रूममधून संबंधित फाईली चोरून नेल्याचा संशय आहे. या फाईली गहाळ झाल्यामुळे न्यायालयीन प्रक्रियेवर परिणाम होण्याची शक्यता व्यक्त करण्यात येत असून, प्रकरणाचे गांभीर्य लक्षात घेऊन पोलिसांत तक्रार दाखल करण्यात आली आहे.
लेखी उत्तरानंतर ठरणार तपासाची दिशा
गुन्हा दाखल झाल्यानंतर या गुन्ह्याचा तपास करणारे पोलीस अंमलदार जितेंद्र तावडे हे सोमवार दि. ६ जुलै रोजी महापालिकेतील अधिकाऱ्यांची भेट घेत चौकशी केली. यामध्ये या विभागात किती कर्मचारी होते त्यापैकी कीती सेवानिवृत्त झाले. ती फाईल कोणकोणत हाताळत होती. तसेच त्या फाईल हातळण्याबाबत आवक जावक मधील नोंदी अशा वेगवेगळ्या दिशेने चौकशी करण्यात आली. या चौकशीचे लेखी उत्तर मिळाल्यानंतरच पोलिस तपासाची दिशा ठरविणार आहे.
फाईल हाताळणारे चौकशीच्या रडारवर
रेकॉर्ड रूममध्ये प्रवेश करणाऱ्या अधिकारी व कर्मचाऱ्यांची माहिती, अभिलेख कक्षातील नोंदी, संबंधित कागदपत्रांची हालचाल, तसेच उपलब्ध तांत्रिक पुरावे आणि इतर बाबींची सखोल पडताळणी केली जाणार आहे. या तपासातून फाईली गहाळ होण्यामागील नेमके कारण समोर येते का आणि जबाबदार व्यक्ती कारवाईच्या रडारवर आले असून त्यांच्यावर कारवाई होते का, याकडे आता सर्वांचे लक्ष लागले आहे.
