मुंबई (वृत्तसंस्था) मनसुख हिरेन यांची गाडी वाझे यांच्याकडे कशी काय? असा सवाल फडणवीस यांनी केला आहे. यावर सचिन वाझे यांनी माध्यमांना प्रतिक्रिया देताना म्हटलं की, मनसुख हिरेन यांची गाडी माझ्याकडे असणं किंवा नसणं यामध्ये काय गुन्हा आहे? गाडी माझ्याकडे असणं हा गुन्हा आहे का? यात नेमका आरोप काय? असा सवाल सचिन वाझे यांनी उपस्थित केला आहे.
उद्योगपती मुकेश अंबानी यांच्या घराबाहेर स्फोटकांनी भरलेली कार सापडली होती. ती कार मनसुख हिरेन यांची असली तरी ती एन्काऊंटर स्पेशालिस्ट सचिन वाझे यांच्याकडे कशी आली? असा सवाल राज्याचे विरोधीपक्ष नेते देवेंद्र फडणवीस यांनी उपस्थित केला. त्यासोबतच सचिन वाझे यांनीच मनसुख हिरेन यांची हत्या केल्याची शक्यता असल्याचा थेट आरोपही फडणवीस यांनी आज केला. यावर सचिन वाझे यांची पहिली प्रतिक्रिया आली आहे. माझ्यावरच्या आरोपांबाबत मला अजून काहीही माहिती नाही. नेमके आरोप काय आहेत हे कळल्यानंतरच मी माझं मत मांडेन. तसेच सचिन वाझे यांनी देवेंद्र फडणवीसांचे सर्व आरोप फेटाळून लावले आहेत. हिरेन यांची गाडी माझ्याकडे असणं हा गुन्हा होत नाही, असं सचिन वाझे यांनी म्हटलं आहे. “मनसुख हिरेन यांची गाडी माझ्याकडे असणं किंवा नसणं यात गुन्हा काय? गाडी माझ्याकडे असणं हा गुन्हा आहे का? यात नेमका आरोप काय?”, असा प्रतिसवाल सचिन वाझे यांनी केला आहे. मनसुख हिरेन यांच्या पत्नी विमला हिरेन यांनी नोंदविलेल्या जबाबा संदर्भात विचारलं असता त्यांचा जबाब मी वाचलेला नाही. त्यांनी काय आरोप केलाय हे मला माहित नाही. जबाब वाचतो आणि त्यानंतर उत्तर देतो, असं सचिन वाझे म्हणाले.
अंबानी स्फोटकं प्रकरणात आढळून आलेल्या स्कॉर्पियो गाडीचे मालक मनसुख हिरेन याचा यांचा मृतदेह संशयास्पद अवस्थेत आढळून आला होता. या मृत्यू प्रकरणाचे तीव्र पडसाद आज विधानसभेत उमटले. विरोधी पक्षनेते देवेंद्र फडणवीस यांनी हिरेन मृत्यू प्रकरणावरून ठाकरे सरकारला धारेवर धरले. त्याचबरोबर हिरेन यांच्या पत्नीच्या जबाबाचा दाखल देत सचिन वाझे यांनीच हिरेन यांचा खून केल्याचं म्हटलं. त्यामुळे सचिन वाझे यांना तात्काळ निलंबित करण्यात यावं, अशी मागणीही भाजपानं लावून धरली. त्यावरून सभागृहात प्रचंड गदारोळ झाला.
विधानसभेत विरोधी पक्षनेते देवेंद्र फडणवीस यांनी सचिन वाझे यांच्यावर गंभीर आरोप केले. वाझे यांना अद्याप अटक का करण्यात आलेली नाही, असा सवालही फडणवीस यांनी उपस्थित केला. “हिरेन यांच्या पत्नी विमला हिरेन यांच्या दाव्यानुसार एन्काऊंटर स्पेशालिस्ट सचिन वाझे यांनीच हिरेन यांचा खून केला असून, या प्रकरणी वाझे यांना अटक करा,” अशी मागणी फडणवीस यांनी केली. यावेळी फडणवीस यांनी त्यांची तक्रारही वाचून दाखवली होती.
