नवी दिल्ली (वृत्तसंस्था) उद्योजक आणि अभिनेत्री शिल्पा शेट्टीचा पती राज कुंद्राला पॉर्न फिल्म चित्रीकरण करुन विकल्याच्या आरोपावरुन मुंबई पोलीस गुन्हे शाखेने अटक केली आहे. राज कुंद्राच्या अटकेनंतर बॉलिवूडमधील काही अभिनेत्रींनी संताप व्यक्त केला आहे. यातच आता बॉलीवूड गायक मीका सिंह याने यावर आपलं मत व्यक्त केलं आहे. ‘मी अ‍ॅप बघितलंय, फार काही नव्हतं’ असं म्हणत त्याने राज कुंद्राला पाठिंबा दिला आहे.
मीका सिंह म्हणाला, “मी तर काय होईल याची वाट पाहत आहे. बघूया… जे होईल चांगलेच होईल, त्यांच्या अ‍ॅपसंदर्भात मला फारसे माहीत नाही. मी एक अ‍ॅप पाहिले होते. ते सिंपल अ‍ॅप होते. त्यात फार काही नव्हते. त्यामुळे चांगलेच होईल अशी आशा करूया. मला वाटते, की राज कुंद्रा एक चांगला मुलगा आहे. आता बघू सत्य काय आणि असत्य काय, जे न्यायालयच सांगू शकते.”
दरम्यान, राज कुंद्राला न्यायालयाने २३ जुलैपर्यंत पोलीस कोठडी सुनावली आहे. अभिनेत्री शिल्पा शेट्टीचा पती राज कुंद्राला अश्लील चित्रपट निर्मितीप्रकरणी सोमवारी रात्री अटक करण्यात आली. फेब्रुवारी महिन्यात मढ परिसरातील एका बंगल्यावर मुंबई पोलिसांनी छापा टाकला होता. तेथे अश्लील चित्रपट निर्मिती सुरू असल्याची माहिती पोलिसांना मिळाली होती. या प्रकरणाच्या तपासाचाच एक भाग म्हणून राज कुंद्राला अटक करण्यात आली आहे.
