जळगाव (प्रतिनिधी) शहरात विना परवानगी बॅनर लावणाऱ्या सहा जणांविरुध्द महापालिकेकडून गुन्हे दाखल करण्यात आले असून ६८ बॅनर काढून जप्त करण्यात आले आहेत. तसेच विना परवाना बॅनर लावणाऱ्यांकडून १६ हजार रुपयांचा दंड आकारण्यात आला आहे. महापालिके ने २३ ते ३० नोव्हेंबर या कालावधीत विशेष मोहीम राबवली, त्यात ही कारवाई करण्यात आली.
विधानसभा निवडणूक लागू होताच शहरातून राजकीय पक्षांचे बॅनर्स, झेंडे व होर्डिंग्ज हटविण्यात आले होते. आता निवडणुकीची आचारसंहिता संपताच अनधिकृत बॅनर मोठ्या प्रमाणात लागले होते. महापालिका आयुक्त ज्ञानेश्वर ढेरे यांनी अतिक्रमण निर्मुलन पथक व किरकोळ वसुली विभागाला संयुक्त मोहीम राबविण्याचे आदेश दिले होते. त्यानुसार या दोन्ही विभागांनी चारही प्रभागात २३ ते ३० नोव्हेंबर या कालावधीत विशेष मोहीम राबवली. यात विना परवानगी लागलेले राजकीय पक्षांसह विविध व्यवसायांचे बॅनर्स हटविण्यात आले. हे बॅनर्स जप्त करण्यासह १६ हजाराचा दंड आकारण्यात आला. शिवाय त्या-त्या पोलीस ठाण्यात शहर विद्रुपीकरण केल्याचा गुन्हे दाखल करण्यात आले. बॅनर व झेंडे काढण्यासाठी महापालिकेने चार पथकाची नियुक्ती केली होती. प्रत्येक प्रभागात एक पथक होते.
विधानसभा सार्वत्रिक निवडणूकीची आदर्श आचारसंहिता लागू झाल्याने शहरातील राजकीय पक्ष व नेत्यांचे बॅनर तात्काळ हटविण्याचे निर्देश जिल्हाधिकारी आयुष प्रसाद यांनी महापालिका आयुक्तांना दिले होते. त्यानुसार महापालिकेचा किरकोळ वसुली विभाग व अतिक्रमण निर्मुलन विभागाच्या पथकाने चार हजारापेक्षा जास्त बॅनर व झेंडे काढले होते.
