जळगाव (प्रतिनिधी) रामानंद नगर पोलिस ठाण्यात पोलिस निरीक्षकांच्या दालनातच पोलिस उपनिरीक्षक व कर्मचारी यांच्यात बाचाबाची झाली. फसवणुकीच्या गुन्ह्यातील आरोपीला मदत करीत असल्याच्या संशयावरुन तो वाद झाल्याचे समोर आले आहे. माहिती अधिकार कार्यकर्ते दिपककुमार गुप्ता यांनी याबाबत पोलीस अधिक्षकांकडे तक्रार केली आहे.
पोलीस उपनिरीक्षक गोपाल देशमुख व पोलीस कर्मचारी अनमोल पटेल यांच्यात वाद झाला. पोलीस निरीक्षकांच्या दालनातच हा वाद झाला. माहिती अधिकार कार्यकर्ते दिपककुमार गुप्ता यांनी याप्रकरणी देशमुख यांच्याशी संपर्क साधला असता त्यांनी शाब्दिक वाद झाल्याचे गुप्ता यांना सांगितले.
नेमकं काय घडलं ?
दरम्यान, माहिती अधिकार कार्यकर्ते दिपककुमार गुप्ता यांनी पोलीस अधिक्षक डॉ.प्रवीण मुंढे यांच्याकडे याप्रकरणी तक्रार केली असून पोलीस ठाण्यातील निरीक्षकांच्या दालनात असलेले सीसीटीव्ही फुटेज तपासून योग्य ती कार्यवाही करण्याची मागणी केली आहे. काही महिन्यांपूर्वी देखील गुप्ता यांनी केलेल्या एका तक्रारीवरून तीन पोलीस कर्मचाऱ्यांची बदली झाली होती मात्र पोलीस निरीक्षकांवर काहीही कारवाई झालेली नाही.
वीर सावरकर नगरातील गीताई अपार्टमेंटचे काही रहिवासी आणि नवकार इंटरप्रायझेस श्रीकृष्ण कॉलनी येथील विशाल राजेंद्र चोपडा यांनी ऍड.केदार भुसारी यांच्यामार्फत नूर मोहम्मद अब्दुल गफूर व मरियमबी अब्दुल गफूर यांच्या विरोधात फसवणुकीचा गुन्हा दाखल करण्याचा अर्ज केलेला होता. सदर प्रकरणी अर्ज चौकशी अंमलदार अनमोल पटेल हे गैरअर्जदारांची बाजू घेत होते. तक्रारदार यांच्या हा प्रकार लक्षात त्यांनी सहाय्यक पोलीस अधिक्षकांकडे तक्रार करीत अनमोल पटेल यांच्याकडून तपास काढून घेण्याची मागणी केली होती.
सहाय्यक पोलीस अधिक्षकांनी अर्जाची दखल घेत तपास काढून घेण्याचे सांगितले. शनिवारी याच प्रकरणात पोलीस निरीक्षक विजय शिंदे यांनी पोलीस उपनिरीक्षक गोपाल देशमुख आणि कर्मचारी अनमोल पटेल यांना दालनात बोलाविले होते. दोघांमध्ये यावेळी जोरदार शाब्दिक वाद झाला. वाद वाढल्याने एकाने दुसऱ्यावर पाणी बाटली आणि खुर्ची देखील फेकून मारल्याचे समजते. दरम्यान, सहाय्यक पोलीस अधीक्षक कुमार चिंथा यांनी देखील या वृत्ताला दुजोरा दिला आहे.
निरीक्षकांच्या दालतान सोक्षमोक्ष
शनिवारी सकाळी ११ वाजता निरीक्षक विजय शिदे यांच्या दालनात उपनिरीक्षक देशमुख, हवालदार पटेल व गैरअर्जदार गफूर असे एकत्र आले. कोण कोणाला काय बोलले यावरुन सोक्षमोक्ष करीत असतानाच पटेल यांनी एकेरी भाषेत उल्लेख करुन आपल्या अंगावर धावून आल्याचा आरोप देशमुख यांनी ‘एका वृत्तसंस्थे’शी बोलताना केला. यासंदर्भात आपण वरिष्ठांकडे लेखी तक्रार केल्याचेही त्यांनी सांगितले.
तरी प्राथमिक व विभागीय चौकशी केली जाणार – कुमार चिंथा
उपनिरीक्षक गोपाल देशमुख व अनमोल पटेल या दोघांची आपण चौकशी केली. चौकशी अर्जातील गैरअर्जदाराच्या संदर्भात दोघांमध्ये वाद झाले होते. गैरसमजुतीतून हा प्रकार घडला आहे. तरी देखील याची प्राथमिक व विभागीय चौकशी केली जाणार आहे, असं सहायक पोलीस अधीक्षक कुमार चिंथा यांनी सांगितले.
