धुळे (वृत्तसंस्था) धुळे महापालिका हा भ्रष्टाचाराचा ‘जळगाव पॅटर्न’ असल्याचा गंभीर आरोप नगरसेवक नागसेन बोरसे यांनी केला. तसेच संबंधितांचे बँक डिटेल्स मागवा, अशी मागणी करत यांनी आपल्याच सत्ताधारी भाजपला अडचणीत आणले आहे.
विधान परिषद निवडणुकीच्या आचारसंहितेमुळे ब्रेक लागलेल्या महापालिकेच्या स्थायी समितीची साप्ताहिक सभा गुरुवारी महापालिका सभागृहात झाली. सभापती जाधव, अतिरिक्त आयुक्त नितीन कापडणीस, नगरसचिव मनोज वाघ, सदस्य, अधिकारी उपस्थित होते. या सभेत प्रभाग क्रमांक १५ मधील सार्वजनिक शौचालये विविध संस्थांना देखभाल-दुरुस्तीसाठी दिली होती. मात्र, संबंधित संस्थांबाबत वारंवार तक्रारी येत असल्याने संबंधित नियुक्त संस्थांकडून शौचालये देखभाल-दुरुस्तीचे काम काढून मे. जमुना बहुद्देशीय संस्थेला देण्याबाबतचा विषय सभेपुढे होता. या विषयाच्या अनुषंगाने सदस्य बोरसे यांनी या जमुना बहुउद्देशीय संस्थेचे अध्यक्ष किंवा प्रमुख कोण, असा प्रश्न प्रशासनाला केला. त्यावर सहाय्यक आरोग्याधिकारी चंद्रकांत जाधव यांनी पवन रत्नाकर बाविस्कर असे नाव सांगितले. हाच धागा पकडून बोरसे यांनी पवन बाविस्कर अर्थात पवन माळी असे त्यांचे नाव असल्याचे म्हणत पवन बाविस्कर (माळी) यांचे वडील महापालिकेत सहाय्यक आरोग्याधिकारी होते, असे सांगितले.
बोरसे म्हणाले, की यापूर्वी महापालिकेत बचतगटांच्या माध्यमातून घनकचरा संकलनाचे काम केले जात होते. यात आदित्य महिला बचतगटही होता. या बचतगटाला कामाचे बिल मिळाल्यानंतर टक्केवारी काढून पैसे पवन माळी यांच्या बँक खात्यात ट्रान्स्फर केले जात होते. भ्रष्टाचाराचा हा जळगाव पॅटर्न धुळे महापालिकेत घडल्याचे बोरसे म्हणाले. या भ्रष्टाचारासाठी पदाचा दुरुपयोग केला गेला, असा आरोपही त्यांनी केला. या प्रकरणात आपण बँकेकडे माहिती मागितली, मात्र बँकेने अशी माहिती देण्यास नकार दिला. त्यामुळे महापालिकेने बँकेकडून याबाबत सविस्तर माहिती मागवावी, अशी मागणी बोरसे यांनी केली. या बँक डिटेल्समधून सर्वकाही समोर येईल, असा त्यांचा रोख होता. दरम्यान, शौचालय देखभाल-दुरुस्तीचे काम मे. जमुना बहुउद्देशीय संस्थेला देण्याचा विषय मंजूर झाला.
