जळगाव (प्रतिनिधी) – महावितरणच्या प्रादेशिक आंतरपरिमंडलीय नाट्य स्पर्धेत जळगाव परिमंडलाने सादर केलेल्या ‘वारी’ या नाटकाने रसिकांची मने जिंकत विजेतेपद पटकावले.
१ व २ ऑक्टोबर रोजी छत्रपती संभाजीनगर येथील तापडिया नाट्यमंदिरात पार पडलेल्या या स्पर्धेत छत्रपती संभाजीनगर, लातूर, नांदेड व जळगाव परिमंडलाने सहभाग घेतला. जळगाव परिमंडलातर्फे डॉ.समीर मोने लिखित व सागर सदावर्ते दिग्दर्शित ‘वारी’ हा नाट्यप्रयोग सादर करण्यात आला. माणसाच्या जन्मापासून ते मृत्यूपर्यंतच्या प्रवासाची वारी ही कालही तशीच होती. आजही तशीच आहे. संत-महात्म्यांच्या शिकवणीतून, अनुभवातून बोध घ्यायचा आणि आपल्या अस्तित्त्वाचा झेंडा रोवायचा, हा संदेश देणाऱ्या या नाटकास रसिकांचा भरभरून प्रतिसाद मिळाला. कथानकाची प्रभावी मांडणी, कलाकारांचा जिवंत अभिनय, नेपथ्याची कल्पकता, प्रकाशयोजनेतील अचूकता तसेच आशयाला पूरक संगीत, रंगभूषा आणि वेशभूषेच्या सुरेख संयोजनामुळे सादरीकरणाला विशेष उठाव मिळाला. या सर्व बाबींच्या एकत्रित परिणामातून जळगाव परिमंडलाने स्पर्धेत सर्वोत्कृष्ट कामगिरी करत विजेतेपदावर नाव कोरले.
मुख्य अभियंता अरविंद बुलबुले, मनीष ठाकरे, महाव्यवस्थापक राजेंद्र पांडे, जीवन चव्हाण, परीक्षक डॉ.दिलीप घारे, पद्मनाभ पाठक, योगिता महाजन, उपमुख्य औद्योगिक संबंध अधिकारी मधुसूदन मराठे यांच्या हस्ते दिग्दर्शक सागर सदावर्ते, जनसंपर्क अधिकारी ज्ञानेश्वर आर्दड व कलावंतांनी विजेतेपदाचा करंडक स्वीकारला. संघास मिळालेली पारितोषिके : दिग्दर्शन : प्रथम – सागर सदावर्ते, अभिनय (पुरुष) : द्वितीय – राहुल निकम, नेपथ्य : प्रथम – कमलेश भोळे, प्रकाशयोजना : प्रथम – रवींद्र चौधरी, संगीत : प्रथम – आशिष कासार, रंगभूषा व वेशभूषा : प्रथम – दीपक कोळी, उत्तेजनार्थ (अभिनय) : दीपाली नरवाडे, उत्कृष्ट बालकलाकार : समर्थ जाधव, दुर्वा वंजारी, गोरक्ष कोळी, गीतार्थ भोळे.
जळगाव परिमंडलाचे मुख्य अभियंता आय.ए. मुलाणी हे या नाटकाचे निर्माते, जळगाव मंडलाचे अधीक्षक अभियंता मदन सांगळे हे सहनिर्माते आहेत. नाटकात राहुल निकम, सागर सदावर्ते, दीपक कोळी, दीपाली नरवाडे, भीमराव सपकाळे, जागृती वाकेकर, रवींद्र चौधरी, कमलेश भोळे, भावना चिडाम, श्रीकृष्ण ठाकूर, अक्षय पाटील, दीपक वंजारी, सचिन भावसार, त्रिकाल अडाणे, पूर्वा जाधव, समर्थ जाधव, दुर्वा वंजारी, गोरक्ष कोळी, गीतार्थ भोळे, हर्षदा चौधरी, मेधा सदावर्ते, भावना निकम, कोमल भोळे, पूनम दडमल, आशिष कासार यांनी भूमिका साकारल्या. अरुण शेलकर, अनिल वाघ, अमित सोनवणे यांचे नाट्यनिर्मितीस सहकार्य मिळाले. विशाल जाधव यांनी संघास मार्गदर्शन केले. या यशाबद्दल मुख्य अभियंता आय.ए. मुलाणी व जळगाव परिमंडलातील वरिष्ठ अधिकाऱ्यांनी सर्व कलावंतांचे अभिनंदन केले आहे.
