भुसावळ (प्रतिनिधी) – भुसावळ शहर पोलीस ठाणे हद्दीत बंद घराचे कुलूप तोडून अज्ञात चोरट्यांनी सुमारे १ लाख ७६ हजार ५०० रुपयांचे सोन्या, चांदीचे दागिने लंपास केल्याची घटना उघडकीस आली आहे.
याप्रकरणी समृद्धी हाईट्समधील दिलीप रणविजय गुप्ता (वय ५५) यांच्या फिर्यादीवरून भुसावळ शहर पोलीस ठाण्यात गुन्हा दाखल करण्यात आला आहे. दरम्यान, दिलीप गुप्ता हे कुटुंबीयांसह लग्नसमारंभासाठी बाहेर गेले होते. यामुळे १० मे रोजी सकाळी ५.३० ते ११ मे रोजी सकाळी ५.३० या कालावधीत घर बंद असल्याची संधी साधून अज्ञात चोरट्यांनी घराच्या मागील बाजूचे दार तोडून घरात प्रवेश केला. त्यानंतर बेडरूममधील कपाटातील साहित्य अस्ताव्यस्त फेकून कपाटात ठेवलेले सोन्या, चांदीचे दागिने चोरून नेले. चोरट्यांनी ४० हजाराचे १५ ग्रॅमचे सोन्याचे ब्रेसलेट, ३० हजारांची १० ग्रॅमची सोन्याची चेन, १५ हजारांचे सोन्याचे झुमके, सोन्याच्या दोन अंगठ्या, लकी, मंगलसूत्र तसेच चांदीची साखळी असा एकूण १ लाख ७६ हजार ५०० रुपयांचा मुद्देमाल चोरुन नेल्याचे फिर्यादीत नमूद करण्यात आले आहे. ११ मे रोजी सकाळी गुप्ता कुटुंबीय घरी परतल्यानंतर हा प्रकार उघड झाला. त्यानंतर त्यांनी तातडीने पोलिसांना माहिती दिली. ही माहिती मिळताच भुसावळ शहर पोलिसांनी घटनास्थळी धाव घेऊन पंचनामा केला. उपविभागीय पोलीस अधिकारी केदार बारबोले व पो. नि. उद्धव डमाळे यांनी घटनास्थळाला भेट दिली. सहाय्यक पोलीस निरीक्षक युनूस शेख तपास करीत आहेत.
