जळगाव (प्रतिनिधी) पुणे आर्थिक गुन्हे शाखेने बीएचआर घोटाळ्यातील मुख्य सूत्रधार अवसायक जितेंद्र कंडारेने इतर आरोपींसोबत मिळून अवघ्या पाच मालमत्ता विक्री करून तब्बल ४८ कोटी ५६ लाख ८२० रुपयांचा अपहार केला आहे. तसेच सन २०२० मध्ये कंडारे व महावीर जैन या दोघांमध्ये तब्बल १४८ वेळेस संभाषण झालेय. तर कंडारेकडून जप्त हार्डडिस्कमध्ये बीएचआरची सन २०२० ची स्कॅन केलेली मिळून आली आहेत. एवढेच नव्हे तर, आतापर्यंत झालेल्या फॉरेन्सिक ऑडिटमध्ये अंदाजे ६५० कर्जखाती एफ.डी. मॅचिंगकरून निरंक केल्याचे निष्पन्न झाले आहे. परंतू यापैकी बऱ्याच कर्जदारांच्या कर्ज मागणी अर्ज व एफ.डी. मॅचिंग झालेल्या फाईल्स कार्यालय झडतीमध्ये मिळून आलेल्या नाहीत. या सर्व फाईल्स पुराव्याच्या दृष्टीने अत्यंत महत्वाच्या असून त्या कुठे लपवून ठेवल्या आहेत, यासह इतर महत्वपूर्ण मुद्द्यांवर कंडारेची आता कसून चौकशी सुरु आहे. थोडक्यात पोलिसांनी कंडारेच्या घोटाळ्याची संपूर्ण कुंडलीच शोधून न्यायालयासमोर ठेवली होती.
जितेंद्र कंडारेची अवसायक या नात्याने काय होत्या जबाबदाऱ्या?
१) भाईचंद हिराचंद रायसोनी मल्टिस्टेट को ऑप सोसायटीवर नोव्हेंबर २०१५ मध्ये केंद्र शासनाच्या कृषी विभागाने अवसायक जितेंद्र कंडारेची नेमणुक केली होती. त्याने दि. ०७ नोव्हेंबर २०१५ रोजी अवसायक पदाचा कार्यभार स्विकारला. जितेंद्र कंडारे हा जिल्हा उपनिबंधक सहकारी संस्था या पदावर कार्यरत होता. त्यामुळे त्याला सहकारी संस्थाच्या कामकाजाविषयी व स्वतःच्या कर्तव्याबाबत पुर्णपणे माहिती व कायदेशिर ज्ञान होते.
२) पतसंस्थेच्या संचालक मंडळांवर गुन्हे दाखल असल्यामुळे कंडारेची सदर पतसंस्थेवर नियुक्ती करण्यात आली होती. त्यामुळे ठेवीदारांना त्यांचे पैस परत मिळवून देण्यासाठी कंडारेची न्याय भुमिका अत्यंत महत्वाची होती.
(३) अवसायक पदावर नेमल्यानंतर पतसंस्थेची मालमत्ता जास्तीत जास्त भावात (बाजार मुल्य) विक्री करणे, कर्जदारांकडून कर्ज रोखीने वसुल करणे, थकबाकीदार कर्जदारांच्या मालमत्ता विक्री करणे, अशा रितीने पैसे जमा करून ठेवीदारांना सम प्रमाणात वाटप करणे केलेल्या संपूर्ण कार्यवाहीच्या सविस्तर नोंदी ठेवायच्या होत्या.
४) पतसंस्थेचे लेखापरिक्षण करुन घेवुन सर्व व्यवहाराबाबत चोख नोंदी ठेवणे गरजेचे होते.
५) ठेवीदारांच्या तक्रारीचे निराकरण करणेही गरजेचे होते.
जितेंद्र कंडारेचा गुन्ह्यातील सहभाग
१) जितेंद्र कंडारे याने आरोपी कृणाल शहा, आरोपी सुनिल झंवर, अटक आरोपी सुरज झंवर, महावीर जैन यांच्याशी व इतर आरोपीशी संगनमत करुन अर्जदार आरोपीने पतसंस्थेच्या मालकीच्या मालमत्ता लिलावाद्वारे विकण्यासाठी www.bhronline.co.in वेबसाईट बनविली.
२) या वेबसाईटचे सर्व पासवर्ड अॅक्सेस कोड/पासवर्ड हे कृणाल शहाकडे होते. त्याद्वारे त्याला कोणत्या व्यक्तीने कोणत्या मालमत्तेसाठी किती रक्कमेचे टेंडर भरले हे कळत होते व याची माहिती जितेंद्र कंडारे, प्रकाश वाणी, सुनिल झंवर, सुरज झंवर, महावीर जैन यांना गुप्त कटाचे सदस्य असल्याने कळत होती.
३) नॅशनल इन्फॉरमॅटिक सेंटर (NIC) च्या केंद्र व राज्य शासनाच्या वेबसाईट उपलब्ध असताना, त्या जास्तीत जास्त लोकांना माहिती असतांना तसेच त्यामध्ये एकमेकांचे टेंडर पाहण्याची सुविधा उपलब्ध नसल्यामुळे त्या सुरक्षित असताना देखील तिचा वापर न करता पाहिजे आरोपी कृणाल शहा याचेकडुन खाजगी वेबसाईट बनवुन ती जास्त लोकांना माहिती होणार नाही, याची दक्षता घेवुन त्याद्वारे टेंडर प्रक्रिया राबविली. सदरच्या शासकिय वेबसाईटबाबत कंडारे हा शासकिय अधिकारी असल्यामुळे त्याला माहित असणे क्रमप्राप्त आहे.
४) बीएचआर पतसंस्थेचे पूर्वीचे सॉफ्टवेअर असताना नविन सॉफ्टवेअर कृणाल शहाच्या मार्फत नोंदीत हेराफेरी करण्यासाठी बनवुन घेतले. हे सॉफ्टवेअर सुनिल झंवर व सुरज झंवरच्या ऑफिसमध्ये इन्स्टॉल करुन दिले होते. तसेच त्याचा पासवर्ड ही दिला होता. तसेच या सॉफ्टवेअरमध्ये मागील तारखेच्या नोंदी करण्याची सुविधा ठेवली होती. या सुविधेद्वारे कर्जदारांची कर्ज खाती मागील तारखेत निरंक करुन त्यांना कर्ज निरंक दाखले देण्यात आले आहे.
५) कर्ज निरंक दाखला देण्याच्या बदल्यात कंडारेने कर्जदारांकडून रोखीने पैसे स्विकारुन सदर रक्कमेचा अपहार केल्याची शक्यता आहे.
६) कंडारेने खाजगी वेबसाईट बनविण्याकरीता डबघाईला आलेल्या पतसंस्थेतुन ठेवीदारांच्या मालकीचे रु. ८२,३४,२६०/- अशी मोठी रक्कम फीच्या नावाखाली आरोपी कृणाल शहाला देऊन ती रक्कम अपहारीत केली आहे. तसेच महावीर जैन व इतर आस्थापनांना देखील संशयास्पद रक्कमा वर्ग केलेल्या आहेत.
७) लिलाव प्रक्रिया पारदर्शकपणे होण्यासाठी वेबसाईटचे नियंत्रण त्रयस्थ व्यक्ती/यंत्रणेकडे असणे आवश्यक आहे. परंतु पाहिजे आरोपी कृणाल शहाने ही वेबसाईट स्वतः बनविलेली असल्याने वेबसाईट स्वतःच्या ताब्यात ठेवली व टेंडर कमिटीचा सदस्य म्हणुन कंडारेसह लिलाव प्रक्रियेत भाग घेतला. प्रत्यक्षात त्याचे काम वेबसाईट बनविण्यापुरतेच मर्यादित असणे आवश्यक होते.
८) कंडारेने इतर आरोपींशी संगनमत करुन कृणाल शहा याचे करवी बीएचआरचे पुर्ण सॉफ्टवेअर सुनिल झंवर व सुरज झंवरच्या कार्यालयात दिसेल अशी तांत्रिक सुविधा उपलब्ध करुन तेथे सदरचे सॉफ्टवेअर डाऊनलोड केले होते आणि वापरासाठी दिले होते. दोन्ही कार्यालये ऑनलाईन लिंक केली होती. त्यामुळे बीएचआरचे कामकाज सुनिल झंवर व सुरज झंवरच्या ऑफिसमध्ये बसुन चालवत येत होते. अगदी तसे चालवले जातही होते.
९) मालमत्ता विक्रीच्या वेळी भरण्यात येणारे टेंडरबाबतची माहिती व कोड कृणाल शहा हा कंडारेच्या संगनमताने सुनिल झंवर व सुरज झंवर यांना कळवत होता. त्यामुळे इतर लोकांनी भरलेल्या टेंडरची माहिती सुनिल झंवरला अगोदरच समजली व त्यानुसार त्याने स्वतःचे टेंडर भरले होते.
१०) कंडारेच्या मर्जीतील व या गुन्ह्यातील प्रमुख आरोपी सुनिल देवकिनंदन झंवर व सुरज सुनिल झंवर यांना स्वस्तात उपलब्ध होण्यासाठी सदर मालमत्तेचे कमी रक्कमेचे मुल्यांकन करुन घेतले व त्या कमी किंमतीतच लिलाव प्रक्रिया राबविली.
११) बेकायदेशिरपणे राबविण्यात आलेल्या लिलाव प्रक्रियेच्या सर्व प्रोसिडींग बुकवर कंडारेने सहया केल्या आहेत.
१२) जितेंद्र कंडारे व इतर आरोपी हे सर्व मुदत ठेवीच्या पावत्या एजंटांमार्फत ३०-३५ टक्क्याने विकत घेवुन कर्जदाराच्या खात्यात मुदत ठेवीची संपुर्ण रक्कम वर्ग करुन ठेवीदाराला सर्व रक्कम दिल्याचे खोटया नोंदी यापुर्वी सुजित वाणीच्या मदतीने केल्या आहेत.
१३) मल्टीस्टेट को ऑप. सोसायटी अॅक्टचे कलम ९० चे नियम २९ नुसार सर्व ठेवीदारांना समान न्यायतत्वाने पैसे वाटप करणे व कर्जदाराकडुन पैसे वसुल करणे सुध्दा आवश्यक असताना आपल्या पदाचा व अधिकाराचा गैरवापर व दूरुपयोग करुन जितेंद्र कंडारेने यापूर्वी सुजित वाणी आणि इतर आरोपींच्या सहकार्याने पुर्वनियोजीत कटानुसार संगनमताने व एका विचाराने कर्जदारांच्या सहाय्याने ठेवीदारांच्या पैशाचा योजनाबद्ध रितीने अपहार केला आहे.
१४) कंडारेने इतर आरोपींशी संगनमत करून नमुद गुन्ह्यातील बीएचआर पतसंस्थेची मालमत्ता लिलाव प्रक्रियेद्वारे खालीलप्रमाणे कमी किंमतीस विकल्या आहे. त्यामुळे ठेवीदारांच्या मालकीच्या रक्कम रु. ४८,५६,२५, ८२० रुपयांचा अपहार झाला आहे.
१५) महाराष्ट्रात संपूर्ण राज्यात प्रसारित होणारे मराठी व इंग्रजी वृत्तपत्रात मालमत्ता विक्रीची जाहिरात देणे आवश्यक असताना कंडारेने केवळ मराठी वृत्तपत्रात जाहिरात दिल्याचे दाखविले. सदरची जाहीरात ही पतसंस्थेच्या कार्यालयात तयार करणे आवश्यक असताना ती प्रत्यक्षात सुनिल झंवर व सुरज झंवरच्या कार्यालयात कंडारेने संगनमताने तयार केल्याचे निष्पन्न झाले आहे.
१६) जितेंद्र कंडारे हा सुजित वाणी, प्रमोद माळी, सुनिल झंवर, महावीर जैन, विवेक ठाकरे, धरम सांकला, कृणाल शहा, प्रकाश वाणी, योगेश सांकला, सूरज झंवर, विकास चोरडीया, माहेश्वरी व इतर यांनी पुर्वनियोजीत कटानुसार एजंट विवेक ठाकरे, अनिल पगारीया, संतोष बाफना, अजय ललवाणी, उदयकुमार कांकरिया, रमेश जैन, अजय जैन, अशोक रूणवाल, शिरीष कुवाड, अतुल गांधी, वसंत चव्हाण व इतरांमार्फत ठेवी परत मिळणार नाहीत. संस्था बुडाली असे भितीचे वातावरण निर्माण केले. ठेवीदारांना २० ते ३५ टक्के रक्कम देण्याचे आमिष दाखवुन व उर्वरीत रक्कम नंतर देतो असे सांगुन त्यांच्या परवानगीविना संमतीविना व इच्छेविरुध्द कोरे स्टॅम्प पेपर व कागदपत्रांवर सहया घेतल्या आहेत व त्यांची बचत खाती / ठेव खाती अर्धवट रक्कम देवूनही बंद केलेली आहेत.
१७) घेतलेल्या ठेवी कुठे वर्ग करणार हे कंडारे व इतर आरोपींनी त्यांच्या सोयीनुसार व कर्जदारांशी संगनमत करुन ठरविले. ठेवींची पुर्ण रक्कम कर्जदाराच्या खात्यात वर्ग करुन ठेवीदाराला सर्व रक्कम मिळाल्याच्या खोटया नोंदी व कर्जदाराने सर्व रक्कम परतफेड केली आहे असे भासविणेसाठी संगणकावर तशा खोटया नोंदी घेतल्या.
१८) पतसंस्थेच्या जवळपास १०० कोटी रुपयापर्यंत कर्जाच्या रक्कमेत ठेवीदारांच्या मुदत ठेवींच्या पावत्या अशा खोटया नोंदी करुन व खोटे बॉड तयार करुन कर्जदाराने सर्व कर्ज परतफेड केले आहे व ठेवीदारांना त्यांची सर्व रक्कम परत केली आहे असे भासवून त्यांना पुर्ण रक्कम अदा केली नाही.
१९) बीएचआर संस्थेतून ठेवीदारांना त्यांचे ठेवीची रक्कम अदा होणे आवश्यक असताना केवळ २० ते ३५ टक्क्यांपर्यंत रक्कम ठेवीदारांच्या खात्यावर परस्पर कर्जदारांकडुन वळती झाली. तर काही ठेवीदारांच्या ठेव पावत्या घेवुन सुध्दा त्यांना कोणतीही रक्कम आजतागयत मिळालेलीच नाही.
२०) लिलावाद्वारे विक्री झालेल्या/करावयाच्या मालमत्तेचे टेंडर हे सुनिल झंवर आणि सुरज झंवर यांनी किंवा त्याच्याशी संबंधित संस्था/नातेवाईक इतर लोकांनीच भरलेले आहेत. अशारितीने टेंडर प्रक्रियेचा दिखावा करून ती फक्त मर्यादित लोकांसाठीच उपलब्ध ठेवली होती. यासंदर्भात तक्रारी आल्या होत्या त्यावर चौकशी केली नाही.
२१) टेंडर धारकांनी मालमत्तेची शंभर टक्के रक्कम डी. डी. किंवा आरटीजीएसद्वारे भरावी असे लेखी पत्राद्वारे अटक आरोपीने टेंडर धारकांना कळवुन देखील टेंडर मध्ये फिक्स डिपॉझिटच्या पावत्या बेकायदेशिररित्या मॅच केलेल्या आहेत.
२२) याबाबत मल्टिस्टेट को. ऑप. अॅक्ट कलम ९० व रुल २९ नुसार अवसायनात गेलेल्या पतसंस्थांच्या ठेवीदारांना त्यांच्या ठेवीची रक्कम समान तत्वाने वाटप करणे आवश्यक आहे. तसेच अशारितीने ठेवी मैचिंग करण्याची कायद्यात तरतुद नाही. अशारितीने ठेवी मॅच केल्यामुळे काही ठेवीदारांना पैसे मिळाले व काहींना अजिबातच पैसे मिळाले नाहीत.
२३) पतसंस्थेविषयी अॅड. किर्ती पाटील यांनी केलेल्या तक्रारी अर्जाची चौकशीच्या अनुषंगाने आर. एस. काबरा या फॉरेन्सिक ऑडिट करणा-या संस्थेची नियुक्ती करण्यात आली होती. यातील तक्रार ही अटक आरोपींच्या विरोधात होती व फॉरेन्सिक ऑडिट करणा-या फर्मला त्याची फी अटक आरोपीने दिली होती.
२४) बीएचआर पतसंस्थेची कागदपत्रे महावीर जैन, विकास चोरडिया यांच्या ऑफिसमध्ये मिळुन आले. सन २०२० मध्ये सुध्दा कंडारे व महावीर जैन मध्ये सतत संपर्क होता. १४८ कॉलस् मिळुन आले. हार्डडिस्क मध्ये २०२० ची बीएचआर पतसंस्थेची पत्र स्कॅन केलेली मिळुन आली आहे.
२५) सुरज झंवर व सुनिल झंवर यांच्या ऑफिसमधील हार्डडिस्कमध्ये बीएचआर पतसंस्थेच्या संबंधित बहुतांश कागदपत्रे मिळुन आली आहेत.
२६) अशा रितीने कंडारेने स्वतःची अवसायक या नात्याने असलेली जबाबदारीची भुमिका डावलुन. पतसंस्थेच्या मालमत्तेचा इतर आरोपीच्या मदतीने कट रचुन अपहार केला. त्यामुळे पतसंस्थेचे व पर्यायाने ठेवीदारांचे नुकसान व फसवणुक केली आहे.
२७) जितेंद्र कंडारेच्या दि. २७ नोव्हेंबर २०२० रोजी घरझडती पंचनाम्यामध्ये मोठ्या प्रमाणात रोख रक्कम ९ लाख ७८ हजार व २५ लाख २७ हजार ४३६ रुपयांचे सोने चांदीचे दागिने मिळुन आले आहेत.
२८) कंडारे याने पतसंस्थेवर नियुक्ती झाल्यापासुन पतसंस्थेचे जाणीवपूर्वक लेखा परिक्षण केले नाही व सदर कालावधीमध्ये मोठ्या प्रमाणात अपहार केला आहे.
पोलिसांना हवीय कंडारेकडून १९ मुद्द्यांची माहिती
१) कंडारे व इतर आरोपींनी अत्यंत योजनाबद्ध रितीने कट रचुन पतसंस्थेच्या मालमत्तांची कमी किंमतीत बनावट लिलाव प्रक्रियेद्वारे विक्री केली आहे. त्यातील २ मालमत्ता पाहिजे आरोपी सुनिल झंवर व अटक आरोपी सुरज झंवर यांनी विकत घेतल्या आहेत. २ मालमत्ता त्याच्या नोतवाईकांनी विकत घेतल्या असून त्याकरीता पैसा सुनिल झंवर यांनीच पुरविल्याचे निष्पन्न झाले आहे. उर्वरित मालमत्ता देखील विकत घेण्याचे सुनिल झंवर व सुरज झंवर यांचे नियोजन होते. त्याकरीता त्या दोघांनी त्यांचेशी संबंधित व्यक्तींनाच टेंडर भरायला लावून पैसे पुरविले आहेत. या कटाबाबत कंडारेची पोलीस चौकशी करणार आहेत.
२) जितेंद्र कंडारे, सुनिल झंवर, महावीर जैन व सुरज झंवर यांनी किती कर्जदाराच्या फाईल एफडी वर्ग करुन निरंक केल्या आहेत. अशा कर्जदार व ठेवीदारांबाबत कंडारेची चौकशी होणार आहे.
३) एफ.डी. मॅचिंग करून कर्ज निरंक केलेले कर्जदार आरोपींकडून तपासात निष्पन्न झालेल्या बाबींबाबत कंडारेकडून सखोल माहिती घेतली जाणार आहे.
४) आतापर्यंत झालेल्या फॉरेन्सिक ऑडिटमध्ये अंदाजे ६५० कर्जखाती एफ.डी. मॅचिंगद्वारे निरंक केल्याचे निष्पन्न झाले आहे. परंतु यापैकी बऱ्याच कर्जदारांच्या कर्ज मागणी अर्ज फाईल व एफ.डी. मॅचिंग झालेल्या फाईल्स कार्यालय झडतीमध्ये मिळुन आलेल्या नाहीत. या सर्व फाईल्स पुराव्याच्या दृष्टीने अत्यंत महत्वाच्या असून त्या कोठे दडवुन ठेवल्या आहेत, याबाबत कंडारेकडे सखोल तपास करून त्या जप्त करण्याचा पोलीस प्रयत्न करणार आहेत.
५) पारस ओसवाल हा पतसंस्था व सुनिल झंवरच्या कार्यालयात अकाऊंटचे काम करीत होता. त्यांच्या संशयास्पद भूमिकेबाबतही कंडारेकडून चौकशी करुन पोलीस पुढील तपास करणार आहे.
६) कंडारेकडून एफ.डी. मॅचिंग करण्याकरीता मदत करणाऱ्या एजंट व नोटरीबाबतही पोलीस तपास करणार आहेत.
७) कंडारेकडून टेंडर प्रक्रिया राबविण्यासाठी बनविण्यात आलेल्या वेबसाईटचा प्रोग्रॅम कोड व सोर्स कोड जाणुन घेवुन सदर वेबसाईटचा डेटा कोणत्या सर्वर / हार्डडिस्कवर सेव्ह केलेला आहे?, याबाबत तपास करुन सदरचा सर्व्हर/हार्डडिस्क जप्त करण्यात येणार आहे.
८) सदरची वेबसाईट कोण कोणत्या ठिकाणी लिंक केलेली आहे? याचाही कंडारेकडून तपास होणार आहे.
९) या वेबसाईटला अन्य काही पेमेंट गेट वे आहेत का? व त्याद्वारे पतसंस्थेच्या पैशांचा अपहार झाला आहे का? याचाही कंडारेची चौकशी होणार आहे.
१०) एफडी धारकांकडुन घेण्यात आलेल्या अॅफिडेव्हिटचा ड्राफ्ट कोणी व कोठे बनविला याबाबत तपास कंडारेकडून केला जाणार आहे.
११) कर्ज खाती निल करताना कंडारेने रोखीने घेतलेल्या कमिशनबाबत तपास करुन सदरची रक्कम पोलिसांना हस्तगत करायची आहे.
१२) कृणाल शहा याला फीच्या नावाखाली दिलेल्या रक्कम रु.८२ लाख ३४ हजार २६० रुपये हे महावीर जैन याला फीच्या नावाखाली दिलेल्या रक्कम रु. ७ लाख तसेच इतर आस्थापनांना संशयास्पदरित्या रक्कमा अदा करुन अपहार केलेल्या एकूण रक्कम रु. १ कोटी ८६ लाख ७२ हजार ४९२ रुपयांबाबत कंडारेची सखोल चौकशी केली जाणार आहे.
१३) कंडारेने पतसंस्थेवर नियुक्ती झाल्यापासुन पतसंस्थेचे जाणीवपूर्वक लेखा परीक्षण केले नाही व सदर कालावधीमध्ये मोठ्या प्रमाणात अपहार केला आहे. याबाबत कंडारेची चौकशी होणार आहे.
१४) कंडारे हा गुन्हा दाखल झाल्यापासून सुमारे ७ महिने फरार होता. या कालावधीमध्ये तो दिल्ली, गुजरात व मध्यप्रदेश आदी राज्यांमध्ये वेगवेगळ्या ठिकाणी वास्तव्यास असल्याचे तपासात निष्पन्न झाले आहे. कंडारेला अटक केली तेव्हा त्याच्या ताब्यात पतसंस्थेचा बॅकअप डेटा असलेल्या ३ हार्डडिस्क ४ मोबाईल हॅन्डसेट व पतसंस्थेशी संबंधित काही कागदपत्रे मिळुन आलेली आहेत. प्रत्यक्षात सदरची माहिती पतसंस्थेतच असणे आवश्यक होती. त्यामुळे त्याच्या फरारच्या कालावधीमध्ये त्याने पतसंस्थेतील अधिक दस्तऐवज, हार्डडिस्क वगैरे पुरावा अन्यत्र कोणाकडे लपवून ठेवला असण्याची किंवा नष्ट केला असण्याची दाट शक्यता आहे. याबाबत कांडारेची कसून चौकशी सुरु आहे.
१५) नमूद कालावधीत त्याचे वास्तव्याचे ठिकाण नक्की कोठे होते, तो या कालावधीत कोणाच्या संपर्कात होता. याबाबतही पोलीस चौकशी करणार आहेत.
१६) सुनिल झंवर व कुणाल शहा हे नेमकं कुठे आहेत, याबाबतही कंडारेकडे चौकशी केली जाणार आहे.
१७) पतसंस्था, कंडारेचे राहते घर सुनिल झंवर व सुरज झंवरच्या कार्यालय व घरझडती पंचनाम्यामध्ये मोठया प्रमाणात दस्तऐवज जप्त करण्यात आलेले आहेत. ते सर्व दस्तऐवज कंडारेला प्रत्यक्ष दाखवुन त्याबाबत त्याची सखोल चौकशी होणार आहे.
१८) कंडारेचे बँक खाते व स्थावर जंगम मालमत्ता याबाबतही पोलीस आता तपास करणार आहेत.
१९) कंडारे फरार असताना ज्या ठिकाणी वास्तव्यास होता.त्या ठिकाणी कंडारेला प्रत्यक्ष नेऊन तसेच जळगाव येथे देखील देत पोलीस तपास करणार आहेत.
विजय वाघमारे (9284058683)
