मुंबई (वृत्तसंस्था) माजी मंत्री एकनाथराव खडसे यांच्यावर शस्त्रक्रिया करण्यात येत असल्याची माहिती त्यांच्या वकिलांनी न्यायालयाला दिलीये. मात्र खडसेंच्या वकिलांनी दिलेल्या माहितीवरुन सामाजिक कार्यकर्त्या अंजली दमानिया यांनी टीका केलीय. हा सर्व खोटेपणाचा कळस असल्याचा आरोप दमानिया यांनी ट्विटरवरुन केलाय.
एकनाथराव खडसे यांच्या वकिलांनी त्यांच्यावर क्रिटीकल अर्थात तातडीची आवश्यकता असणारी शस्त्रक्रिया होणार असल्याची माहिती दिल्याच्या कारणावर सामाजिक कार्यकर्त्या अंजली दमानिया यांनी टीका केली आहे. त्या म्हणाल्या की, हा सर्व खोटेपणाचा कळस आहे. खडसे यांनी अलीकडेच अपंगत्वाचे प्रमाणापत्र घेतल्याचा उल्लेख करून त्यांनी जोरदार टीका करण्याचे ट्विट केले आहे.
भोसरी येथील वादग्रस्त भूखंड खरेदी प्रकरणी माजी मंत्री एकनाथराव खडसे यांचे जावई गिरीश चौधरी यांना ईडीने अटक केली आहे. या व्यवहारात मदत केल्याचा ठपका ठेवून अटक करण्यात आलेले तत्कालीन उपनिबंधक रवींद्र मुळे यांना ईडीने गेल्या आठवड्यात अटक केली होती. त्यांना दोन दिवसांपूर्वी जामीन मिळाला आहे. दरम्यान, सोमवारी पीएमएलए न्यायालयाने एकनाथराव खडसे आणि त्यांच्या पत्नी मंदाताई खडसे यांना गुरूवारपर्यंत कोर्टात उपस्थित राहण्याचे निर्देश दिले होते.
या पार्श्वभूमिवर, आज सेशन कोर्टात एकनाथराव खडसे यांच्यावतीने त्यांच्या वकिलांनी माहिती दिली की, खडसे यांना बॉबे हॉस्पीटलमध्ये दाखल करण्यात आले असून त्यांच्यावर शस्त्रक्रिया करण्यात येणार आहे. तर मंदाताई खडसे यांनी या प्रकरणात अटकपूर्व जामीनासाठी अर्ज दाखल केला असून यावर आता सुनावणी होणार आहे.
