मुंबई (वृत्तसंस्था) भाजप नेते तथा माजी खासदार किरीट सोमय्या यांचा व्हायरल व्हिडिओ मॉर्फ नसून खरा आहे. तसेच आता पोलीस व्हिडिओ लिक करणाऱ्याचा शोध घेत असल्याची माहिती समोर येत आहे.
भाजप नेते किरीट सोमय्या यांचा आक्षेपार्ह व्हिडिओ लोकशाही या मराठी वृत्तवाहिनीने प्रसिद्ध केला होता. राज्य विधिमंडळ अधिवेशनाच्या ऐन तोंडावर हा व्हिडिओ लिक झाल्यामुळे प्रचंड खळबळ उडाली होती. त्यानंतर राज्याचे उपमुख्यमंत्री तथा गृहमंत्री देवेंद्र फडणवीस यांनी या प्रकरणाच्या उच्चस्तरीय चौकशीचे आदेश दिले होते. त्यानंतर या प्रकरणाचा तपास मुंबई गुन्हे शाखेच्या युनिट 10 कडे सोपवण्यात आला होता. गुन्हे शाखेने प्राथमिक आधारावर संबंधित वृत्तवाहिनीशी संपर्क साधून व्हिडिओची मागणी केली. त्यानंतर त्याचे विश्लेषण केले असता हा व्हिडिओ खरा असल्याचे निष्पन्न झाले, असे वृत्त ‘दिव्य मराठी’न दिले आहे.
लोकशाही या मराठी वृत्तवाहिनीने 17 जुलै रोजी किरीट सोमय्या यांचा कथित आक्षेपार्ह व्हिडिओ प्रसारित केला होता. यानंतर विधान परिषदेतील विरोधी पक्षनेते अंबादास दानवे यांनी हा मुद्दा सभागृहात मांडत सोमय्या यांच्यावर गंभीर आरोप केले होते. सोमय्या यांनी धमकावून काही मराठी महिलांचे शोषण केल्याचा आरोपही त्यांनी केला होता. त्यांनी सोमय्या यांच्या व्हिडिओचा समावेश असणारा पेनड्राइव्ह उपसभापती नीलम गोऱ्हे यांच्याकडे सुपूर्द केला होता. त्यानंतर फडणवीस यांनी या प्रकरणाची उच्चस्तरीय चौकशी करण्याची घोषणा केली. यानंतर आता सोमय्या यांचा व्हायरल व्हिडिओ मॉर्फ नसून खरा आहे. तसेच आता पोलीस व्हिडिओ लिक करणाऱ्याचा शोध घेत असल्याची माहिती समोर येत आहे.
