चोपडा (प्रतिनिधी) येथील महात्मा गांधी शिक्षण मंडळ संचलित दादासाहेब डॉ. सुरेश जी. पाटील महाविद्यालयाच्या भूगोलशास्त्र विभागामार्फत आज रोजी ‘चांद्रयान-३’ मोहिमेचे लाईव्ह प्रक्षेपण पाहण्यासाठी आयसीटी हॉलमध्ये सुविधा उपलब्ध करण्यात आलेली होती. याप्रसंगी महाविद्यालयाचे प्राचार्य डॉ. डी. ए. सूर्यवंशी, उपप्राचार्य प्रा.डॉ. ए. एल. चौधरी, प्रा. एन. एस. कोल्हे, महाविद्यालयाचे समन्वयक व भूगोलशास्त्र विभाग प्रमुख डॉ. शैलेश वाघ तसेच महाविद्यालयातील प्राध्यापक वृंद, सर्व कर्मचारी बंधू भगिनी व विद्यार्थी विद्यार्थिनी उपस्थित होते.
याप्रसंगी सुरुवातीला भूगोलशास्त्र विभाग प्रमुख डॉ. शैलेश वाघ यांनी चंद्रयान-३ मोहिमेची पार्श्वभूमी व यापूर्वीच्या भारत व इतर राष्ट्रांच्या मोहिमा याबद्दल उपस्थितांना माहिती दिली. त्यानंतर चांद्रयान -३ मोहिमेच्या सॉफ्ट लँडिंगच्या लाईव्ह प्रक्षेपणाचा सर्वांनी त्या ठिकाणी आनंद घेतला. जगाच्या व भारताच्या इतिहासातील ऐतिहासिक सुवर्ण क्षणांचे साक्षीदार आज रोजी महाविद्यालय परिसरातील सर्व कर्मचारी वृंद झाले.
इस्रोच्या चांद्रयान मोहीम ३ यशस्वीतेचा याची देही, याची डोळा अनुभव सर्वांनी घेतला. महाविद्यालयाच्या प्रांगणात मोहिमेच्या यशाबद्दल फटाके फोडून व भारत मातेच्या विजयाच्या घोषणा देऊन आनंद उत्सव साजरा करण्यात आला.
यानंतर महाविद्यालयाचे प्राचार्य यांनी चांद्रयान 3 मोहिमेच्या यशस्वीेतेबद्दल इस्रोच्या सर्व वैज्ञानिक टीमला व सर्व भारतीयांना या भव्य दिव्य यश संपादनासाठी मनःपूर्वक शुभेच्छा देऊन अभिनंदन केले तसेच या चांद्रयान 3 मोहिमेच्या लाईव्ह प्रक्षेपणाचे आयोजन केल्याबद्दल भूगोलशास्त्र विभागाचे मनःपूर्वक अभिनंदन केले.
