जळगाव (प्रतिनिधी) शहरातील सागरपार्कची जागा हडप करण्यासाठी महाविकास आघाडी सरकारतर्फे १०० कोटी रूपयांची सुपारी देण्यात आल्याचा खळबळजनक आरोप आज भाजपचे जिल्हाध्यक्ष तथा आमदार राजूमामा भोळे यांनी आजच्या पत्रकार परिषदेत केला आहे.
वॉटरग्रेस प्रकरणी आमदार गिरीश महाजन यांचे प्रसारमाध्यमांमध्ये नाव घेतले जात असल्याबद्दल आज भारतीय जनता पक्षाच्या कार्यालयात पत्रकार परिषदेचे आयोजन करण्यात आले होते. या पत्रकार परिषदेत आमदार राजूमामा भोळे म्हणाले की, वॉटरग्रेस प्रकरणी कुणालाही पाठीशी घातले जाणार नाही. पण सागर पार्कच्या जागेसाठी १०० कोटी रूपयांची मागणी करण्यात येत आहे. वॉटरग्रेसपेक्षा हे प्रकरण त्यापेक्षा किती तरी पटीने मोठे असल्याचा दावा राजूमामा भोळे यांनी केला. एक वकील आणि एक महिला हे आयुक्तांवर यासाठी दबाव आणत असल्याचे राजूमामा भोळे म्हाणाले. या परिषदेला आमदार राजूमामा भोळे, महानगराध्यक्ष दीपक सूर्यवंशी, महापौर भारती सोनवणे, ज्येष्ठ नगरसेवक कैलास सोनवणे व विशाल त्रिपाठी यांची उपस्थिती होती.
