जळगाव (प्रतिनिधी) – आगामी गणेशोत्सव, ईद या सणानिमित्ताने कायदा व सुव्यवस्थेसाठी जिल्हा पोलीस अधीक्षक श्रीकांत ढिवरे यांच्या सूचनेनुसार रावेर पोलीस स्टेशन चे पोलीस निरीक्षक संदीप पाटील यांच्या मार्गदर्शनाने वतीने पोलिसांच्या वेगवेगळ्या पथकाने शहरातील हॉटेल्स व लॉज यांची तपासणी केली असता एका हॉटेल्स मध्ये अल्पवयीन मुलगी व एक मुलगा पोलिसांना सापडला मुलावर पोक्सो अंतर्गत गुन्हा दाखल करण्यात आला आहे. कोणतीही नोंद न करता अल्पवयीन मुलगी व २३ वर्षीय तरुणाला रूम उपलब्ध करून दिल्याप्रकरणी रावेर पोलिसांनी लॉज मॅनेजरला तात्काळ अटक केली असुन पॉक्सो अंतर्गत गुन्हा दाखल करण्यात आला आहे. या प्रकरणातील दोन्ही आरोपींना पोलिसांनी ताब्यात घेतले आहे.
सावदा रोडवरील हॉटेल येथे दि. २५ ऑगस्ट रोजी दुपारी साडेबारा वाजेच्या सुमारास नितीन सुभाष महाजन (वय २३, रा. वाघोड, ता. रावेर) हा १६ वर्षीय अल्पवयीन मुलीला ‘फ्रेश होण्यासाठी’ घेऊन आला होता. सणानिमित्त रावेर पोलिसांकडून शहरातील हॉटेल व लॉजिंगची तपासणी सुरू असताना हा प्रकार पोलिसांच्या निदर्शनास आला.
या प्रकरणात हॉटेल मॅनेजर सुभाष चुडामण पाटील (वय ४३, रा. अजंदा, ता. रावेर) याने कोणतेही ओळखपत्र न घेता तसेच लॉजिंगच्या रजिस्टरमध्ये नोंद न करता रूम उपलब्ध करून दिल्याचे पोलिसांच्या तपासात समोर आले. तसेच संबंधित प्रकाराची माहिती पोलिसांना देणे आवश्यक असतानाही ती लपवून ठेवल्याचा आरोप आहे. त्यामुळे पोलिसांनी मॅनेजरविरुद्धही गुन्हा दाखल करून त्याला अटक केली. या प्रकरणी रावेर पोलीस ठाण्यात पॉक्सो अधिनियम २०१२ मधील कलम ४, १६ व २१ अंतर्गत गुन्हा दाखल करण्यात आला आहे. पॉक्सो कायद्यानुसार अशा गुन्ह्याची माहिती न देणेही गंभीर स्वरूपाचा गुन्हा आहे. गुन्हा दाखल करण्याची कारवाई पोहेकॉ नितीन आमोदकर यांनी केली. पोलीस निरीक्षक संदीप पाटील यांच्या मार्गदर्शनाखाली सहाय्यक पोलीस निरीक्षक हरिदास बोचरे पुढील तपास करीत आहेत.
शहरातील लॉजिंग व हॉटेलमध्ये यापुढेही अशा अचानक तपासण्या सुरू राहतील त्यात बेकायदेशीरपणे लॉजिंगमध्ये रूम उपलब्ध करून देणाऱ्या चालक व व्यवस्थापकांसह गुन्हेगारांविरुद्ध कठोर कारवाई करण्यात येईल, तसेच त्यांचे परवाने रद्द करण्यासंदर्भात कारवाई करण्यात येईल.
- संदीप पाटील पोलीस निरीक्षक पोलीस स्टेशन रावेर
