जळगाव (प्रतिनिधी) नळाला पाणी आल्याने पाण्याची मोटार लावतांना विजेचा शॉक लागून संगिता मच्छिंद्र कुंभार (वय ४०, रा. असोदा, ता. जळगाव) यांचा दुर्देवी मृत्यू झाला. ही घटना मंगळवारी सकाळी ८ वाजेच्या सुमारास घडली. याप्रकरणी तालुका पोलीसात अकस्मात मृत्यूची नोंद करण्यात आली आहे.
जळगाव तालुक्यातील असोदा गावात संगिता कुंभार या महिला पती व दोन मुलांसह वास्तव्यास होत्या. मंगळवारी सकाळी नळाला पाणी आले होते. संगिता कुंभार यांनी ईलेक्ट्रीक – मोटार लावून त्या पाणी भरत होत्या. थोड्या वेळाने विद्युत पुरवठा खंडीत झाला होता. त्यामुळे त्यांचे पती यांनी मोटार बंद करण्याचे पत्नी संगिता यांना सांगितले. दरम्यान, संगिता कुंभार यांनी बटन बंद करण्यासाठी गेल्या तेवढ्यात विद्युत पुरवठा सुरू झाला आणि त्यांना विजेचा जोरदार धक्का बसला. त्यात त्यांचा जागीच मृत्यू झाला.
ही घटना घडल्यानंतर पती मश्चिद्र कुंभार यांच्यासह गावातील ग्रामस्थांनी धाव घेवून खासगी वाहनातून त्यांना शासकीय वैद्यकीय महाविद्यालयात उपचारार्थ दाखल करण्यात आले. वैद्यकीय अधिकारी डॉ. स्नेहन दुगड यांनी तपासणी अंती मयत घोषीत केले. वैद्यकीय अधिकाऱ्यांनी विवाहितेला मयत घोषीत करताच त्याच्या कुटुंबियांनी जिल्हा शासकीय वैद्यकीय रुग्णालयात एकच आक्रोश केला. याप्रकरणी तालुका पोलीस ठाण्यात अकस्मात मृत्यूची नोंद करण्यात आली. मयत महिलेच्या पश्चात पती, एक मुलगा आणि मुलगी असा परिवार आहे. या घटनेमुळे असोदा गावात हळहळ व्यक्त होत आहे.
