नवी दिल्ली (वृत्तसंस्था) दिल्लीचे नागरिक ज्या क्षणाची आतुरतेनं वाट पाहात होते तो आज अखेर आलाच. पंतप्रधान मोदींचं स्वप्न आज पूर्ण होणार असून दिल्लीतील नागरिकांना चालकाशिवाय चालणाऱ्या मेट्रो ट्रेननं प्रवास करण्याचा अनुभव घेता येणार आहे. दिल्लीमध्ये आज पंतप्रधान नरेंद्र मोदींच्या हस्ते या स्वयंचलित मेट्रोचं उद्घाटन होणार आहे. या मेट्रो ट्रेनला आज पंतप्रधान मोदी हिरवा झेंडा दाखवणार आहेत.
DMRCने दिलेल्या माहितीनुसार विना चालक मेट्रो धावल्यानंतर दिल्ली मेट्रोचं नावही जगभरातील अग्रणी मेट्रो सेवांमध्ये नोंदलं जाईल. जून २०२१ पर्यंत पिंक लाईन म्हणजे मजलिश पार्क ते शिव विहार या मेट्रो मार्गावरील ५७ किलोमीटर विना चालक मेट्रो धावण्याची शक्यता आहे. म्हणजे दिल्लीतील चाकरमान्यांना एकूण ९४ किलोमीटरचा प्रवास विना चालक मेट्रोतून करता येणार आहे. नॅशनल कॉमन मोबॅलिटी कार्ड म्हणजे NCMC ची सुविधाही मेट्रो प्रवाशांसाठी मोठी उपयुक्त ठरणार आहे. या कार्डच्या माध्यमातून देशाच्या कुठल्याही कोपऱ्यात एअरपोर्ट एक्सप्रेस लाईनवर प्रवास करता येणार आहे. २०२२ पर्यंत दिल्ली मेट्रोच्या सर्व लाईन्सवर कॉम मोबॅलिटी कार्डद्वारे प्रवासाची सोय होण्याची शक्यता आहे. मेजेंटा लाईनवर जनकपुरी ते नोएडाच्या बॉटनिकल गार्डन या मार्गावर सुरु होणाऱ्या विना चालक मेट्रो सेवेमुळे दिल्लीकरांना मोठा दिलासा मिळणार आहे. रोज लाखो प्रवासी कॉरिडॉरवर प्रवास करतात. त्यात आयटी कंपन्या आणि नोयडातील नामांकित कंपन्यांमध्ये काम करणाऱ्या कर्मचाऱ्यांचा समावेश आहे. ही मेट्रो विना चालक असल्यामुळे वेळेचं खास बंधन असेल. त्याचबरोबर कधी उशीर झाला तर वेग वाढवून प्रवाशांना वेळेत त्यांच्या नियोजित स्थळी पोहोचवण्याचे प्रयत्नही केले जाणार आहेत.
दिल्लीमध्ये पहिल्यांदा २००२ मध्ये मेट्रो धावली होती. आज या घटनेला तब्बल १८ वर्ष पूर्ण होत आहेत. आता राजधानी दिल्लीमध्ये देशातील पहिली स्वयंचलित मेट्रोल धावणार आहे. आजच्या घडीला दिल्लीतील मेट्रोचं जाळं हे जगातील सर्वात मोठं नेटवर्क असल्याचं समजलं जात आहे.
