धरणगाव (प्रतिनिधी) एक गाव एक वान या संकल्पनेअंतर्गत स्मार्ट कॉटन प्रकल्पात धरणगाव तालुक्यातील पष्टाणे येथे कावेरी सिड्स चे जादू या वाणाची गावात जास्त लागवड झालेली आहे. तरी ज्या शेतकऱ्यांनी या वाणाची लागवड केली असेल त्यांचे गावात गट स्थापन करून कापूस ते कापड अभियान गटामार्फत राबविण्याबाबत शेतकऱ्यांना प्रकल्प उपसंचालक आत्मा तडवी यांनी शेतकऱ्यांना मार्गदर्शन केले.
कृषी विभागाच्या विविध योजनांची माहिती तालुका कृषी अधिकारी किरण देसले यांनी दिली. जादू वाणाचे पीक व्यवस्थापनाविषयी कंपनी प्रतिनिधी सुदर्शन पाटील यांनी शेतकऱ्यांना मार्गदर्शन केले. कार्यक्रमाचे सूत्रसंचालन आत्मा बिटीएम दीपक नागपुरे यांनी केले. गट स्थापन करून विविध योजनांच्या लाभाबाबत बिटीएम यांनी शेतकऱ्यांना माहिती दिली. कार्यक्रमास कॉटन ग्रेडर बी.बी. पाटील, गावाचे सरपंच प्रकाश भिल, कावेरी कंपनी प्रतिनिधी प्रमोद देसले, पोक्रा जिल्हा समन्वयक शिंदे आदी उपस्थित होते. कार्यक्रमाचे आभार प्रदर्शन कृषी सहाय्यक गणेश बाविस्कर यांनी केले.
