जळगाव (प्रतिनिधी) – अल्पवयीन मुलीला घरी बोलवून तिच्यासोबत फोटो काढले. त्यानंतर वारंवार सोशल मीडियावरून तिला मेसेज करण्यासह अश्लील फोटो पाठवून तिचा विनयभंग केला. हा धक्कादायक प्रकार जुलै २०२३पासून सुरू होता. या प्रकरणी रामानंद नगर पोलिस ठाण्यात संशयित आकाश सूर्यकांत पाटील (रा. शिव कॉलनी) याच्याविरुद्ध पोक्सो कलमानुसार गुन्हा दाखल करण्यात आला आहे.
शहरातील रामानंद नगर पोलिस ठाण्याच्या हद्दीतील एका परिसरात राहणाऱ्या १७ वर्षीय मुलीने नुकतीच इयत्ता बारावीची परीक्षा दिली आहे. सन २०२३ मध्ये तिची आकाश पाटील याच्याशी इन्स्टाग्राम या सोशल मीडिया साईटवरून ओळख झाली व तेव्हापासून ते एकमेकांना मेसेज करीत होते. सन २०२४ मध्ये पीडित मुलगी इयत्ता अकरावीत असताना तिने लायब्ररी लावल्यानंतर याठिकाणी दोघांची पहिल्यांदा भेट झाली. त्यावेळी तरुणाने त्याचे वय २५ वर्षे सांगून तो पोलिस भरतीची तयारी करीत असल्याचेही सांगितले होते.
मुलीसह तिच्या मैत्रीणीसोबत पाहिला सिनेमा
पहिल्या भेटीनंतर सदर तरुणाने या मुलीला त्याच्या घरी बोलविले. त्यानुसार ती तिच्या मैत्रिणीसोबत तेथे गेली. त्याच्या घरी या तरुणाने अल्पवयीन मुलीसोबत फोटो काढले. त्यानंतर काही दिवसांनी तो मुलीला व तिच्या मैत्रिणीला सिनेमा पहायला घेऊन गेला. ही बाब घरी माहिती पडल्यानंतर दोघांच्याही
घरी समज दिली होती. लग्नाचे अमिष देत जवळीक साधण्याचा प्रयत्न
मुलीच्या घरी माहिती मिळाल्यानंतर सदर मुलगी तरुणाला भेटण्यास नकार देऊ लागली. तरीदेखील तो इन्स्टाग्रामवरून वेगवेगळे मेसेज करून व व तू १८ वर्षांची पूर्ण झाल्यानंतर लग्न करण्याचे सांगून जवळीक
साधण्याचा प्रयत्न करू लागला. पीडितेने तरुणासोबत बोलण्यास नकार दिल्यानंतर त्याने ‘तू जर माझी झाली नाही तर मी आत्महत्या करेल’ अशी धमकीही दिली.
अश्लिल फोटो बघितल्यानंतर दिली, पोलिसात तक्रार
आत्महत्येची धमकी दिल्यानंतर तो तरुण एवढ्यावरच न थांबता त्याने या मुलीला अश्लील फोटो पाठविले. ते तिच्या वडिलांनी पाहिले. त्यानंतर या प्रकरणी मुलीने रामानंद नगर पोलिस ठाण्यात फिर्याद दिली. त्यावरून आकाश पाटील याच्याविरुद्ध पोक्सो कलमान्वये गुन्हा दाखल करण्यात आला आहे. तपास उपनिरीक्षक सचिन रणशेवरे करीत आहेत.
