जळगाव (प्रतिनिधी) कारच्या डिक्कीतून गहाळ झालेली दागिन्यांची बॅग पितापुत्रांच्या प्रामाणीकपणामुळे मूळ मालकास आज एमआयडीसी पोलिस स्टेशनचे पोलिस निरिक्षक प्रताप शिकारे यांच्या हस्ते परत देण्यात आली.
धर्मेंद्र पाटील (रा. हिरापुर, खंडवा – मध्य प्रदेश) हे नातेवाईकाच्या लग्नानिमित्त 10 डिसेंबर रोजी एमआयडीसी परिसरात आले होते. लग्न आटोपल्यानंतर त्यांनी सोन्याचे दागीने असलेली बॅग त्यांच्या कारच्या डिक्कीत ठेवली होती. परंतु काही वेळानंतर उघड्या कारच्या डिक्कीत ठेवलेली दागीने असलेली बॅग त्यांना गहाळ झाली असल्याचे लक्षात आले. सीसीटिव्ही फुटेज तपासले असता मोटार सायकलवरील दोघे जण ती बॅग रस्त्यावरुन उचलत असल्याचे त्यांना दिसले. बॅग गहाळ झाल्याबाबत त्यांनी एमआयडिसी पोलिस स्टेशनला धाव घेत खबर दिली. तेवढ्यात पोलिस पथकासोबत चंदनसिंग चव्हाण व त्यांचा मुलगा यश असे दोघे जण ती बॅग घेवून पोलिस स्टेशनला हजर झाले. सदर बॅग रामेश्वर कॉलनी परिसरातील आदित्य चौकात कारच्या डिक्कीतून पडली होती, असे त्यांनी सांगीतले. बॅगमधील सर्व वस्तू तपासून पाहिल्या असता सर्व वस्तू बरोबर होत्या. त्यानंतर ती बॅग व त्यातील वस्तू धर्मेंद्र पाटील यांना पो.नि.प्रताप शिकारे यांच्या हस्ते परत देण्यात आली.
