गडचिरोली (वृत्तसंस्था) औषधी घेऊन निघालेल्या दुचाकीला भरधाव टेम्पोने समोरासमोर झालेल्या अपघातात दुचाकीवरील एक जागीच ठार झाला तर अन्य एक जखमी झाल्याची घटना १६ मे रोजी घडली. पंकज भजभुजे (२९, रा. टेंभा, ता. गडचिरोली) असे मयताचे नाव असून, किरण नागोसे (४५, रा. सावरगाव, ता. धानोरा) हे जखमी आहेत.
किरण यांच्या पत्नीला किडनी स्टोनचा त्रास होता. त्यामुळे ते दोघे दुचाकी (एमएच ३३ एए ७०४५) वरून विसोरो येथे १६ मे रोजी औषध आणण्यासाठी गेले होते. औषध घेऊन ते गावी परतत होते. दुपारी सव्वा चार वाजेच्या सुमारास देसाईगंज तालुक्यातील विहीरगाव मोहटोला रस्त्यावरील शिरपूर फाट्यावर समोरून येणाऱ्या अज्ञात टेम्पोने त्यांच्या दुचाकीला जोराची धडक दिली, यात दोघेही दुचाकीवरून कोसळले. डोक्याला गंभीर मार लागून रक्तस्राव झाल्याने पंकज यांचा जागीच मृत्यू झाला, तर किरण हे जखमी आहेत. त्यांना जिल्हा रुग्णालयात हलविले. दरम्यान, अपघातानंतर टेम्पोसह चालक पसार झाला. अज्ञात चालकावर गुन्हा दाखल करण्यात आला आहे.
