जळगाव (प्रतिनिधी) दूध संघात दोन हात केल्यानंतर चाळीसगावचे आमदार मंगेश चव्हाण यांनी पुन्हा एकदा राष्ट्रवादीचे ज्येष्ठ नेते तथा आमदार एकनाथराव खडसे यांच्या मुक्ताईनगर मतदार संघात धडक दिली आहे.
दूध संघात आमदार चव्हाणांनी मुक्ताईनगर तालुक्यातून मंदाकिनी खडसेंविरोधात निवडणूक लढवली. ही निवडणूक जिंकल्यानंतर अवघ्या चार दिवसांमध्येच ते पुन्हा आमदार एकनाथ खडसेंच्या मतदारसंघात धडकले आहेत. मुक्ताईनगर तालुक्यातील बुधवारी रात्री कुऱ्हा काकोडा गावात भर पावसात आमदार मंगेश चव्हाण यांनी ग्रामपंचायत निवडणुकीची प्रचार सभा घेतली. या सभेची राजकीय वर्तुळात चांगलीच चर्चा रंगली आहे. ग्रामपंचायतीच्या निवडणुका सुरू असून, येत्या १८ डिसेंबर रोजी मतदान होणार आहे. मुक्ताईनगर तालुक्याचे राजकीय केंद्र अशी ओळख असलेल्या कुन्हा या गावाची निवडणूक देखील होत असून, या निवडणुकीत भाजप- शिंदेसेनेच्या पॅनलचा प्रचार करण्यासाठी आमदार चव्हाण बुधवारी रात्री तेथे गेले होते. या वेळी रात्री ८ वाजता भर पावसामध्ये त्यांनी सभा घेतली. या सभेला जिल्हा परिषदेचे माजी अध्यक्ष अशोक कांडेलकर, नंदकिशोर महाजन, डॉ. राजेंद्र फडके उपस्थित होते.
