रिवा (वृत्तसंस्था) मध्य प्रदेशमधील रीवा येथील भाजपा खासदार जनार्दन मिश्रा यांनी आपल्याचे पक्षाचे नेते व पंतप्रधान नरेंद्र मोदी यांच्याबद्दल एक विचित्र विधान केल्याचं समोर आलं आहे. त्यांनी पंतप्रधान नरेंद्र मोदी यांच्या दाढीतून घरं पडत असल्याचं म्हटलं आहे. मोदींनी एकदा दाढी झटकली की ५० लाख घरं त्यातून पडतात, असं मिश्रा म्हणाले आहेत.
जनार्दन मिश्रा यांचा काही दिवसांपूर्वीचा व्हिडीओ सोशल मीडियावर व्हायरल झाला आहे. हा व्हिडीओ सेमरिया विधानसभा मतदारसंघातील आहे. ४३ सेकंदांच्या व्हिडीओमध्ये मिश्रा बघेली भाषा बोलत आहेत. ‘जोपर्यंत या देशातील एक एका व्यक्तीला पीएम आवास मिळणार नाही, तोपर्यंत मोदींच्या दाढीतून घर पडत राहतील, पडतच राहतील. मोदींच्या दाढीत घरंच घरं आहेत. जोपर्यंत दाढी आहे, तोपर्यंत कोणीही घराशिवाय राहणार नाही,’ असं मिश्रा म्हणाले.
‘मोदींनी एकदा त्यांच्या दाढीला झटका दिल्यावर ५० लाख घरं पड़तात. मोदींनी दुसऱ्यांदा दाढी हलवल्यावर १ कोटी घरं निघतात. जोपर्यंत आमदार म्हणतील, तोपर्यंत दाढीतून घरं पडत राहतील. मोदींची दाढी आणि पीएम आवास दोन्ही अमर आहेत, असंही मिश्रा पुढे म्हणाले. या कार्यक्रमाला सेमरियाचे आमदार के. पी. त्रिपाठी आणि सर्वसामान्य जनता उपस्थित होती. मिश्रा यांच्या विधानांवर टाळ्यांचा कडकडाट झाला.
