मुंबई (वृत्तसंस्था) DCGI कडून आपत्कालीन वापरासाठी मंजुरी मिळाल्यानंतर आता १६ जानेवारीपासून लसीकरणाला सुरुवात करण्यात येणार आहे. याच पार्श्वभूमीवर सीरम इन्स्टिट्यूटमधील लसीकरणासाठी लसीचे डोस वेगवेगळ्या भागांमध्ये पोहोचवण्याचं काम सुरू आहे. बुधवारी पहाटे याचा पहिला साठा मुंबईमध्ये दाखल झाला असून मुंबईकरांची प्रतीक्षा संपली आहे. १ लाख ३९ हजार ५०० कुप्या मुंबईत पोहोचल्या आहेत.
केंद्र सरकारने भारत बायोटेक आणि सीरमच्या दोन कोरोना लसींच्या आपत्कालीन वापरला परवानगी दिली आहे. याच पार्श्वभूमीवर सीरम इन्स्टिट्यूटमधील लसीकरणासाठी लसीचे डोस देशातील वेगवेगळ्या भागांमध्ये पोहोचवण्याचे काम युद्ध पातळीवर सुरु आहे. आज पहाटे ५.३० वाजता मुंबईत या लसीचा पहिला साठा पोहचला असून लसीबाबतची मुंबईकरांची प्रतिक्षा आता संपली आहे. महानगरपालिकेच्या आरोग्य खात्याच्या कर्मचाऱ्यांनी लसीचा पहिला साठा बृहन्मुंबई महानगरपालिकेच्या विशेष वाहनाने पुण्याहून मुंबईत आणला. महानगरपालिकेच्या आरोग्य खात्याच्या कर्मचाऱ्यांनी लसीचा हा पहिला साठा पुण्याहून मुंबईत आणला. पोलिसांची दोन वाहनं सुरक्षिततेचा बंदोबस्त म्हणून सोबत होती. एफ/दक्षिण विभाग कार्यालयात लस साठा वाहनाचे बृहन्मुंबई महानगरपालिका प्रशासनाकडून स्वागत करण्यात आले. त्यानंतर तळमजल्यावरील लस भांडार कक्षात विहित प्रक्रियेनुसार लस साठवण्यात आली आहे. मुंबईत लस साठवून ठेवण्यासाठी कांजूरमार्ग येथे महापालिकेच्या जागेत कोल्डस्टोरेज उभारण्यात आलं आहे. या कोल्डस्टोरेजमध्ये एक कोटी लस साठवून ठेवण्याची क्षमता आहे. मात्र याचं काम पूर्ण होऊ शकलेलं नाही. दुरुस्तीकामे पूर्ण न झाल्याने आरोग्य विभागाने आता लसींचा साठा परळ येथील आरोग्य विभागाच्या मुख्य कार्यालयात करण्याचा निर्णय घेतला. परळ येथील एफ साऊथमधील कार्यालयात १० लाख लसींचा साठा केला जाऊ शकतो. आतापर्यंत एक लाख ३० हजार आरोग्य कर्मचाऱ्यांची नोंदणी को-विन अॅपवर झालेली आहे. मुंबईमधील लोकसंख्या लक्षात घेऊन महापालिकेच्या शाळांमध्येही लसीकरण केंद्र सुरू करण्याचा विचार प्रशासन पातळीवर सुरू आहे. तथापि, शाळांमध्ये आवश्यक ती सर्वच वैद्यकीय यंत्रणा उभारावी लागणार आहे. त्यामुळे अखेरच्या टप्प्यात गरज भासली तरच पालिका शाळांध्ये लसीकरण केंद्र सुरू करण्याचा विचार आहे.
दरम्यान, पुण्यातील सीरम इन्स्टिट्यूटकडून सुमारे १,३९,५०० डोस बृहन्मुंबई महानगरपालिकेला मिळाले आहेत. एफ/ दक्षिण विभाग कार्यालयातून मुंबईत ठिकठिकाणी निर्देशित लसीकरण केंद्रांमध्ये ही लस पोहोचवण्यात येईल. १६ जानेवारीला मुंबईत लसीकरणासाठी सुरुवात होणार आहे. त्यामुळे आता मुंबईकरांची प्रतीक्षा संपली असून प्रत्यक्षात लसीकरणाच्या दिवसाची मुंबईकर आतूरतेनं वाट पाहात आहेत.
राज्यात पहिल्या टप्प्यात मुंबई ३, कोल्हापूर १, पुणे २ लसीच्या व्हॅन पोहचल्या आहेत तर दुसऱ्या टप्प्यात म्हणजेच आज राज्यातील २६ ठिकाणी लसीच्या व्हॅन जाणार असल्याची माहिती मिळाली आहे. मंगळवारी १३ शहरांमध्ये लसीचा पहिला साठा ८ विमानांच्या सहाय्यानं पोहोचवण्यात आला होता.
