शिंदखेडा (प्रतिनिधी) अनैतीक संबंधात अडसर ठरणा-या पतीची पत्नी आणि प्रियकराने हत्या केल्याचे पोलिस तपासात उघड झाले आहे. सोनगीर येथील घटनेने परिसरात खळबळ माजली आहे. दारुच्या नशेत लोखंडी रॉडने अगोदर मयतास मारहाण करण्यात आली. त्यानंतर त्याच्या पायाला तार बांधून तो विहीरीत टाकून देण्याचा प्रकार करण्यात आला. याप्रकरणी पत्नी आणि प्रियकराला अटक करण्यात आली आहे.
सोनगीर ते बाभळे जुन्या मुंबई आग्रा महामार्गालगत सोनगीरपासून दोन किलोमीटर अंतरावरील धुळ्याचे संजय येवले यांना आपल्या शेतातील विहिरीत सुमारे ४० वर्षीय अज्ञात इसमाचा मृतदेह बुधवारी दुपारी आढळून आला होता. मृताच्या अंगावर केवळ बनियन व अंडरपॅन्ट होती आणि त्याचे पाय अॅल्युमिनियम तारेने बांधले होते. तसेच दोरीने दगड बांधला होता. अनेक दिवसांपासून मृतदेह पडलेल्या व कुजलेल्या अवस्थेत असल्याने विहिरीजवळ दुर्गंधी पसरली होती. यासंदर्भात येवले यांनी पोलिसांना खबर केली. पोलिसांनी मृतदेह बाहेर काढला असता मृतकाच्या डोक्यावर वार केल्याने चेहऱ्याचा चेंदामेंदा झाला होता. याप्रकरणी हवालदार सदेसिंग चव्हाण यांनी दिलेल्या फिर्यादीवरून शिंदखेडा पोलीस ठाण्यात अज्ञात व्यक्तीविरोधात खुनाचा गुन्हा दाखल झाला होता.
पोलीस निरीक्षक सुनील भाबड़, सहायक पोलीस उपनिरीक्षक गोराडे यांनी तपास सुरू केल्यानंतर मयत निंबा रुपला पाटील हा पत्नी अनिता व तीन मुलींसह सोनगीरला इंदिरानगरात राहत असल्याचे उघडकीस आले. अनिता हिला ताब्यात घेऊन विचारपूस सुरू केली. तेव्हा ती बोलती झाली. निंबा हा तिच्या चारित्र्यावर संशय घेऊन सतत मारहाण करत होता. त्या वासास कंटाळून पत्नी अनिताने आपला प्रियकर शरद शालिग्राम पाटील यास पती निबाचा बंदोबस्त करण्याचे सांगितले. त्यानुसार शरद याने २० ऑक्टोबर रोजी रात्री निंबाला दारू पाजून जिवे ठार मारले व पाय तारेने बांधून मृतदेह विहिरीत टाकून दिल्याची कबुली स्वतः अनिता हिने पोलिसांना दिली. तिच्या कबुलीनंतर पोलिसांनी अनिता आणि तिचा प्रियकर शरद या दोघांना अटक केली आहे.
