नागपूर (वृत्तसंस्था) युवक- युवतीने टोकाचं पाऊल उचलत एकाच दोरीने गळफास लावून दोघांनीही जीवनयात्रा संपविली. गौरव राजेंद्र बगमारे (वय १८,पेंढरी (निंबा), ता. पारशिवनी) असे युवकाचे, तर ममता ( नाव बदलेलं, वय १७), अशी मृतकांची नावे आहेत. ही दुखद घटना पारशिवनी तालुक्यातील पेंढरी (निंबा) येथे ५ सप्टेंबरला सकाळी उघडकीस आली.
मृत गौरवच्या घराशेजारी असलेल्या एका घरात कुणीही राहात नसल्याने कित्येक दिवसांपासून बंद आहे. मंगळवारी सकाळी त्या घराचे दार नागरिकांना उघडे असल्याचे दिसले. औत्सुक्यापोटी काहींनी आत जाऊन बघितले असता, त्यांना गौरव व ममता एकाच दोराला लटकलेल्या अवस्थेत दिसले. यानंतर गौरवचे वडील घटनास्थळी पोहोचल्यानंतर त्यांना धक्का बसला. त्यांनी लगेच याची माहिती पारशिवनी पोलिसांना दिली. पोलिसांनी दोघांचे मृतदेह खाली उतरून ग्रामीण रुग्णालय पारशिवनीत आणले. डॉक्टरांनी तपासून दोघांनाही मृत घोषित केले.
दोन्ही मृतदेहांची उत्तरीय तपासणी करण्यात आली. ही घटना प्रेमप्रकरणातून घडली, असावी, अशी चर्चा नागरिकांत आहे. घटनेचे नेमके कारण काय, याबाबतचा तपास पारशिवनी पोलीस करीत असून आकस्मिक मृत्यूची नोंद करण्यात आली आहे.
गौरव बगमारे हा करंभाड येथील तथागत विद्यालयाचा बारावीचा विद्यार्थी होता. तिथूनच त्याने परीक्षा उत्तीर्ण केली.
बारावीनंतर त्याची सावनेर येथील आयटीआयमध्ये डिझेल मेकॅनिकमध्ये निवड झाली होती. आजपासून तो कॉलेजमध्ये जाणार होता, तर मृत ममता ही पारशिवनी येथील हरिहर विद्यालयाची इयत्ता बारावीची विद्यार्थिनी होती. ४ सप्टेंबरला जान्हवी रात्री गौरवच्या घरी आली होती. तिथेच मंगळवारी पहाटेच्या सुमारास दोघांनीही एकाच दोरीने गळफास लावून आत्महत्या केली. याबाबतचे वृत्त आज एका दैनिकाने दिले आहे.
